Qazaqstan Senatynyń tóraǵasy Qasym-Jomart Toqaev OBSE Parlamenttik Assambleıasynyń Venada ótken qysqy sesıasynyń ashylýynda uıymnyń qoldanyp otyrǵan shekteý sharalaryna kóńili tolmaıtynyn aıtty, - dep habarlaıdy «Qamshy» portaly 24.kz– ke silteme jasap.

Eýropa elderi basqa elderdiń parlamentshilerine qatysty qoldanyp otyrǵan shekteýlerge narazylyq bildirgen Q. Toqaev uıymnyń eń aldymen memleketter arasynda ózara senim qalyptastyrýǵa, ortaq saıası jobalar sheńberinde jumys isteýge muryndyq bolýy kerektigin aıtty.

«Biz Forým jumystaryna parlament depýtattarynyń, ásirese olardyń spıkerleriniń qatysýyna vızalyq shekteýler arqyly tosqaýyl qoıýdy durys dep sanamaımyz. HHİ ǵasyr saıasatynda sanksıalarǵa oryn joq. Óıtkeni, ondaı sanksıalar álemdik ekonomıkany shatqaıaqtatyp jiberedi. Sanksıalar qoldaný – Birikken ulttar uıymynyń jumysy jáne ondaı sanksıalar eń sońǵy shara retinde qoldanylýy kerek», - depti Q. Toqaev myrza.

Qazaq parlamentshisiniń aıtqanyn Reseı Dýmasynyń komıtet tóraǵasy Leonıd Slýskıı Toqaevtyń bul málimdemesin qoldap, «Toqaev qazaq saıasatkerine tán emes shuǵyl málimdeme jasady» degen. Sondaı-aq, ol Q. Toqaevty «Eýropalyq masshtabtan da asyp túsetin iri saıasatker» dep baǵalaǵan.

Osy L. Slýskıı ótken jyldyń qarasha aıynda Eýrazıalyq ekonomıkalyq odaq elderiniń ortaq valútasy ázirlenip jatyr degen málimdeme jasap, biraz shý týǵyzǵan edi.

OBSE Parlamenttiń Assambleıasynyń qysqy sesıasy 25 aqpanda Avstrıa astanasynda ashylǵan bolatyn. Oǵan 50 eldiń parlament ókilderi qatysyp, eki kún boıy álemdik mańyzy bar máselelerdi talqylaýda.

 «Qamshy» silteıdi