Elimizdiń mádenıet jáne sport mınıstri Arystanbek Muhamedıuly óziniń kıiný stıline qatysty túsinik berdi, - dep habarlaıdy «Qamshy» portaly Tengrinews.kz– ke silteme jasap.

Áleýmettik jelide mádenıet jáne sport mınıstri A. Muhamedıulynyń Egıpet Islam respýblıkasynyń prezıdenti Abdel Fattah As-Sısıdi áýejaıdan kútip alýǵa kıip barǵan kıimi biraz talqylaýǵa ushyraǵan edi. Jeli qoldanýshylarynyń bir toby A. Muhamedıuynyń bul «modasyn» oǵashtyq dep sókse, endi biri onyń stıldik turǵydaǵy artyqshylyǵy dep baǵalady. Mınıstr osy máselege oraı óz oıyn bildiripti.

«Bul «de Gol» stıli.. Birinshiden, men qazaqstandyq tigin sheberhanalarynda kıim tikkizemin, shetelden satyp almaımyn. Óz elimniń patrıoty retinde osynda tikkizemin», - degen A. Muhamedıuly bul isinen eshqandaı oǵashtyq kórmeıtinin aıtqan.

«Sheteldik qonaqtardy, mysaly Nıkıta Mıhalkovty eske túsirýge bolady. Bul stılde eshqandaı asyp-tasýshylyq joq. Qarapaıym. Ne Brioni. Shynyn aıtý kerek, bizde, sheneýnikterde belgili-bir shekteýler bar. Soǵan qaramastan, bul – mádenıet salasy. Men ózim mýzykantpyn, vıolonchelıspin, ony nege kórsetpeske? Biraq, men qandaı da bir stıldiń fanaty emespin, eshqandaı sán qýmaımyn. Ondaı múldem joq», - deıdi ol.

Mádenıet jáne sport mınıstri kıiný stılinde Elbasy N. Nazarbaevty úlgi tutatynyn aıtýdy da umytpaǵan.

«Bizdiń prezıdentimiz de sándi kıinedi. Onyń galstýktary ylǵı ashyq tústi ekenin aıtýǵa bolady. Ol beıresmı kezdesýlerge árqashan qyzyqty kıinip barady... Men úshin adam ózine qatty kóńil bólip, shekten shyǵyp ketpeýi mańyzdy. Biraq, tym surqaı kıinýge de bolmaıdy. Kıimimniń bárin Qazaqstanda tiktiremin. Stıl máselesinde kelinshegim kómektesedi. Ol da óner adamy, ónertaný kandıdaty. Aıtsa da, áıelder úshin eń tamasha áshekeı – talǵammen kıinetin kúıeýi degen sóz bar», - degen A. Muhamedıuly óziniń kıiný stıli týraly.

A. Muhamedıuly Mysyr basshysyn kútip alýǵa sur tústi matadan tigilgen, qaltalary men jaǵasy qara tústi matamen kómkerilgen paltomen barǵany ǵalamtor qoldanýshylary arasynda birshama sóz bolǵan edi. Ol Elbasynyń Almaty qalasyna sońǵy is-saparyna da osy paltomen kelgen edi.