Búgin - Qazaqstanda Alǵys aıtý kúni.  Qazaqstan Respýblıkasynyń Prezıdenti Nursultan Nazarbaevtyń 2016 jylǵy 14 qańtardaǵy Jarlyǵymen Qazaqstanda Alǵys aıtý kúni bekitildi.

1995 jyldyń 1 naýryzynda elimizde  Qazaqstan halqy Assambleıasy quryldy jáne 2015 jyly Assambleıanyń jıyrma jyldyǵyn merekeleý aıasynda Memleket basshysy bul kúndi halyqtardyń bir-birine jáne qazaqtarǵa kóptegen halyqtar elge kúshtep qonystandyrylǵan kezde  tózimdilik pen qonaqjaılylyq tanytqany úshin alǵys bildire alatyn kún dep jarıalaýdy usyndy.

Elimizde 130-dan astam ult pen ulys ókilderi bir úıdiń balasyndaı ǵumyr keshýde. Qazaqstan - azamattyq kelisimdi, túrli mádenıetter pen dinderdi toǵystyrǵan kópultty, zaıyrly memleket.

Bul kúni Astanada kóptegen sharalar uıymdastyrý kózdelip otyr. Ulttyq ulan áskeri qolbasshylyǵy Alǵys aıtý kúnine taqyryptyq kesh ótkizgeli otyr. Qazaqstan Respýblıkasynyń Ulttyq mýzeıinde «Murajaıǵa kitapty syıǵa tartý» sharasy ótedi. «Kerýen» saýda oıyn-saýyq ortalyǵynda «Qazaqfılm» stýdıasy shyǵarǵan «Anaǵa aparar jol» fılminiń premerasy ótpek.

Sondaı-aq osyndaı mádenı-buqaralyq sharalar elimizdiń barlyq oblystary men túpkir-túpkirinde ótedi.