Ál-Farabı atyndaǵy Qazaq ulttyq ýnıversıtetiniń stýdentteri bıyl elimizde alǵash ret toılanyp otyrǵan 1 naýryz – «Alǵys aıtý» kúnin erekshe atap ótti. Olar kıeli qara shańyraq ál-Farabı atyndaǵy QazUÝ-ǵa óz  alǵystaryn bildirýdi jón kórip,  «Raqmet» sózi beınelengen  fleshmob uıymdastyrdy, - dep habarlaıdy «Qamshy» portaly ýnıversıtettiń Baspasóz qyzmetine silteme jasap.

Asqaq armandary oryndalyp, elimizdegi úzdik ýnıversıtetke oqýǵa túsken stýdentter fleshmob arqyly ózderine sapaly bilim men tálimdi tárbıe berip jatqan bilim ordasyna, onyń basshylyǵy men barsha oqytýshy profesorlar qaýymyna sheksiz alǵystaryn jetkizýdi maqsat etti. 

Ásem Alataý baýraıynda oryn tepken kórikti QazUÝ qalashyǵynda jastarǵa barlyq jaǵdaı jasalǵanyn, sporttyń kez kelgen túrimen shuǵyldanyp, shymyr bolýǵa, tynysh ári jaıly ómir súrýge zor múmkindik bar ekendigin maqtanyshpen aıta kelip, stýdentter shyn júrekten jan-jaqty damýǵa jol ashqan ýnıversıtetke sheksiz rızashylyqtaryn aıtty. «Ál-Farabı atyndaǵy QazUÝ-da oqyp, osy ýnıversıtettiń  túlegi ataný – jarqyn bolashaqqa degen nyq qadam», – dedi jastar.

Sharany QazUÝ-dyń Jastar uıymdarymen jumys jónindegi bólim men Jastar uıymdary komıteti uıymdastyryp, stýdentterdiń bastamasyna qoldaý bildirdi.