Almaty turǵyndarynyń sany kún saıyn 100 adamǵa tolyǵady. Qaladaǵy perzenthanalarda táýligine orta eseppen osynsha sábı dúnıe esigin ashady eken. Al, qalalyq emhanalar kún saıyn 140 myń adamdy, - dep habarlaıdy «Qamshy» portaly «Almaty» telearnasyna silteme jasap.

Bıyl qalada birqatar densaýlyq saqtaý mekemesi paıdalanýǵa berildi. Olar Túrksib, Naýryzbaı jáne Alataý aýdandarynda oryn tepken. Oǵan qosa, №6 jáne №11 qalalyq emhanalardyń qosymsha ǵımarattary jýyrda ashylatyn bolady. Sonymen qatar, qalalyq klınıkalyq juqpaly aýrýlar aýrýhanasynyń zerthanalyq korpýsynyń qurylysy aıaqtalýda.

"Ashylatyn medısınalyq nysandardy qabyldaýǵa máslıhat depýtattaryn tartýdy kózdep otyrmyz. Qalqaman yqsham aýdanynda 200 adamǵa shaqtalǵan emhanananyń qurylysy júrgizilýde. Sondaı-aq osy jyldyń tamyz aıynda №14 emhanany qoldanysqa berýdi josparlap otyrmyz",- dedi Almaty qalasy densaýlyq saqtaý basqarmasynyń basshysy Ýálıhan Ahmetov.

Almatyda jazataıym oqıǵalar men jaraqat jáne ýlanýdan bolatyn ólim sany salystyrmaly túrde 2,4 paıyzǵa tómendegen. Ótken jyly 973 myńnan asa adam skrınıngtik tekserýden ótip, 95 myńy naýqas ekeni anyqtalǵan. Týberkýlezden ólim kórsetkishi 3 esege qysqarypty. Al, bul aýrýmen syrqattaný kórsetkishi 35 paıyzǵa tómendep, respýblıka boıynsha joǵary nátıje kórsetken. Qýanyshty jańalyq, ótken jyly qalada ana men bala óliminiń kórsetkishi kemipti.

"Meniń oıymsha, elimizdegi azamattardyń basym bóligi Almatyda emdeledi. Ásirese, patologıasy bar naýqastar dertine shıpa alý úshin qalalyq dárigerlerge júginedi. Almaty donor bolǵandyqtan, basqa óńirlerge qaraǵanda oǵan joǵary jetistikterdi kórsetý qıynǵa soǵady",- dedi QR Densaýlyq saqtaý jáne áleýmettik damý mınıstrligi komıtetiniń tóraǵasy Ámir Ahetov.

Kún saıyn Almatydaǵy emhanalarǵa 140 myńnan astam turǵyn kómekke júginedi. Sonyń ishinde 60 myńnan astam azamatqa zerthanalyq, 15 myńnan astamyna dıagnostıkalyq zertteý júrgiziledi. Sondaı-aq eki myńǵa jýyq naýqas kúndizgi stasıonarda em qabyldaıdy. Olarǵa 30 myńnan astam dáriger qyzmet kórsetedi.