Aqpan aıynyń sońǵy kúninde Almaty oblysy Qarasaı aýdanynyń aýmaǵynda oblystyq İİD jol-patrýldik polısıa qyzmetkeri men jergilikti kásipker arasynda týyndaǵan kıkiljiń polıseıdiń qarý qoldanýymen aıaqtalǵan. Eń qyzyǵy polıseı qyzmettik kıim úlgisinde mas kúıinde zań buzýshylyqqa barǵan. Atalǵan oqıǵa týraly ratel.kz saıty vıdeojazba jarıalady.

Onda 29 aqpan kúni Almaty oblysy Jambyl aýdany Qanshengeldi aýdanynda patrúldik qyzmet atqarǵan polıseı qyzmetten soń keshki saǵat toǵyzdar shamasynda «Lada-Prıora» markaly jeke kóligimen Almaty qalasyna qaıtyp kele jatyp, jol boıynda qarsy baǵytta kele jatqan kólikti toqtatqan. Ol kóliktiń júrgizýshisi de tegin adam emes, arnaıy organdardyń, atap aıtqanda Prezıdenttiń kúzet qyzmetiniń burynǵy qyzmetkeri ekeni keıin belgili bolady. Kólik júrgizýshisi polıseıdiń ústinen ishimdik ısi shyǵyp turǵanyn baıqap, onyń kózinshe «102» nómirine qońyraý shalady. Muny kórgen polıseı kóligine otyryp alyp, qasha jóneledi. Burynǵy «chekıs» te qarap qalmaı, qashqyn polıseıdiń izine túsip, bolǵan jaǵdaı týraly polısıaǵa taǵy bir márte qońyraý shalady. Qashqan polıseı Almaty qalasy Naýryzbaı aýdanyndaǵy jeke úılerdiń biriniń aldyna kelip toqtap, qýǵynshyǵa qarata tabeldik qarýdan birneshe márte oq atady. Munyń barlyǵy vıdeoda anyq kórinedi.

ratel.kz saıty Almaty oblysy İİD-den atalǵan polıseıdiń óreskel áreketi tártiptik keńeste qaralǵany, tártiptik keńes sheshimimen qyzmetten shyǵarylǵany, sondaı-aq, İİD basshylyǵy da jaýapqa tartylǵany týraly jaýap alǵandaryn aıtady. Alaıda, saıt redaksıasy da, oblystyq İİD-de tún ishinde negizsiz qarý qoldanǵan polıseıdiń kim ekeni týraly naqty aqparat taratpaǵan.