Osy aptada Elbasy Nursultan Nazarbaevtyń Ókimimen elimizdiń Syrtqy  ister mınıstriniń tórt orynbasary birden aýysty. Sondaı-aq Qazaqstannyń Dúnıejúzilik saýda uıymyna kirýine zor eńbek sińirgen Janar Aıtjanova Shveısarıadaǵy Elshi bolyp taǵaıyndaldy, - dep habarlaıdy «Qamshy» portaly QazAqparatqa silteme jasap.

Sonymen Qazaqstan Respýblıkasy Syrtqy ister mınıstriniń birinshi orynbasary qyzmetine Muhtar Beskenuly Tileýberdi taǵaıynaldy. Ol Ońtústik Qazaqstan oblysynda dúnıege kelgen. Qazaq memlekettik ýnıversıtetin bitirgen. Aǵylshyn, koreı jáne japon tilderin jetik biledi. 1993 jyldan beri elimizdiń Syrtqy ister mınıstrligi júıesinde jumys istegen.

Kelesi vıse-mınıstr Aqylbek Ábsatuly Kamaldınov de Ońtústik Qazaqstan oblysynda týǵan. Qazaq memlekettik ýnıversıtetin bitirgen. 2007 jyldan beri Qazaqstannyń Japonıadaǵy Tótenshe jáne Ókiletti Elshisi bolǵan.

Al vıse-mınıstr  Ǵalymjan Telmanuly Qoıshybaev Qyzylorda oblysynda dúnıege kelgen. M.Lomonosov atyndaǵy Máskeý memlekettik ýnıversıtetin támamdaǵan. Fılosofıa ǵylymdarynyń kandıdaty. 2009 jyldan Qazaqstannyń Latvıa Respýblıkasyndaǵy Tótenshe jáne Ókiletti Elshisi qyzmetin atqarǵan.

QR SİM vıse-mınıstri Roman Iýrevıch Vasılenko Shymkent qalasynda dúnıege kelgen. Reseı Qarýly kúshteriniń Ekonomıka, qarjy jáne quqyq áskerı akademıasyn bitirgen. 2014 jyldan beri QR SİM Halyqaralyq aqparat komıtetiniń tóraǵasy boldy.

Al Janar Aıtjanova Qazaq memlekettik ýnıversıtet, Birikken Vena ınstıtýtyn, Garvard ýnıversıtetiniń Kennedı atyndaǵy memlekettik basqarý mektebin bitirgen. 2011 jyldan beri elimizdiń Ekonomıkalyq ıntegrasıa isteri mınıstri bolyp, Qazaqstannyń Dúnıejúzilik saýda uıymyna kirýine zor eńbek sińirgen.

Únzıla Shapaq QR Konstıtýsıalyq Keńes múshesi bolyp taǵaıyndaldy. Ol 1973 jyly týǵan, joǵary zańgerlik bilimi, zań ǵylymdarynyń doktory ǵylymı dárejesi bar. 2011 jyldan beri «Qazaq Memlekettik Zań ýnıversıteti» AQ Joǵarǵy quqyq mektebiniń dırektory qyzmetin atqaryp kelgen.

Uzaqbaı Qarabalın «KAZENERGY» qaýymdastyǵy tóraǵasynyń orynbasary bolyp taǵaıyndaldy. ol 1947 jyly 14 qazanda Atyraý oblysy Embi aýdany Qosshaǵyl kentinde dúnıege kelgen. 1970 jyly I.M. Gýbkın atyndaǵy Máskeý munaı-hımıa jáne gaz ónerkásibi ınstıtýtyn «Munaı men gaz kenishterin ıgerýdiń keshendi mehanıkalandyrý jáne tehnologıasy» mamandyǵy boıynsha támamdaǵan. Qazaqstan Respýblıkasy Ulttyq ınjenerlik akademıanyń akademıgi, 40-tan astam maqala, kitap, 5 ónertapqyshtyq jańalyqtyń avtory. Qazaqstannyń Eńbek Eri. 
3-dárejeli «Barys» ordenimen (2005 j.), «Qurmet» ordenimen (2000 j.), «Otlıchnık razvedkı nedr SSSR» belgisimen (1988 j.), «Qazaqstan Konstıtýsıasyna 10 jyl» mereıtoılyq medalimen (2005 j.), «Qazaqstan Respýblıkasynyń Parlamentine 10 jyl» mereıtoılyq medalimen (2006 j.), «Lıder rossııskoı ekonomıkı» ordenimen (2005 j.), Qazaqstan Respýblıkasy jer qoınaýynnyń qurmetti barlaýshysy» (2003 j.) ataǵymen marapattalǵan.