Qytaı halyq respýblıkasynyń Qazaqstandaǵy elshisi Chjan Hanhoı Astanada BAQ ókilderimen kezdesýde eki el arasyndaǵy vızalyq rejım saıasatyna qatysty pikirin bildirip, qazaq bıliginiń áreketin synǵa aldy, - dep habarlaıdy «Qamshy» portaly.

Qytaı taraby qazaq bıliginen vıza rásimdeýdiń tártibin jeńildetýdi talap etýde. Astanada qazaqstandyq BAQ ókilderimen júzdesken QHR-dyń Qazaqstandaǵy tótenshe jáne ókiletti elshisi Chjan Hanhoı qytaı dıplomattarynyń vızalaryn rásimdeýge baılanysty Qazaqstan basshylaryn synǵa aldy. Elshiniń aıtqan sózderi jazylǵan vıdeo ǵalamtorda tarap júr.

«Biz Qazaqstandy ózimizdiń adal dosymyz, senimdi áriptesimiz, mańyzdy kórshimiz dep sanaımyz. Qazaqstannyń prezıdentin bizdiń tóraǵanyń dosy dep bilemiz. Onyń ishki, syrtqy saıasatyn qoldaımyz. Biz Qazaqstan Úkimetin qoldaımyz, sizdiń halyqty qoldaımyz» degen elshi Qytaıdyń ekonomıkalyq, basqa da áleýetin alǵa tarta kele, vıza rásimdeý tártibine qatysty Qazaqstan bıligine qoqan-loqqyǵa uqsas sózder aıtqan.

«Olar (Qazaqstan bıligi – red.) kimmen betpe-bet kelip otyrǵandaryn bile me? Qytaı – sizderdiń kórshilerińiz, ol eshqashan qazaqtar men Qazaqstannyń múddelerine qol suqpady, osy ulttyń, osy halyqtyń gúldenip turǵan shaǵynda da shabýyl jasamaǵan. Ol BUU qaýipsizdik keńesiniń turaqty múshesi. Ol – strategıalyq áriptes, qazir «óte mańyzdy» degen sózdi qosa aıtyp júrmiz. Al, sizder vıza rásimdeý máselesinde qorlaıtyn ádisterge júginip otyrsyzdar», - deıdi elshi.

Qytaı elshisi óz eliniń dıplomattary Qazaqstanǵa kelý úshin ashylatyn vızanyń tek úsh aı merzimmen shektelgenine narazylyq bildirip, bul elshilik qyzmetkerleriniń qyzmeti men turmysyna qolaısyzdyq týǵyzady dep otyr.

Al, buǵan deıin Shyǵys Qazaqstan oblysynda bolǵan Shyńjań uıǵyr avtonomıalyq ólkesi úkimeti basshysynyń orynbasary Shı Dagan 50 adamǵa deıingi qytaılyq týrıser tobyn Qazaqstanǵa vızasyz kelý múmkindigin qarastyrýdy suraǵan edi.

Vıdeo ratel.kz saıtynan alyndy.