Erejesiz jekpe-jekten WBK tujyrymy boıynsha, Qytaıdyń Shanhaı qalasynda ótken jarystyń fınalynda rıngke shyqqan eki sportshynyń saıysy týraly tórtkil dúnıe qyzý talqy jasady. «Qamshy» portaly tilshisi básekege túsken otandasymyz Aıbek Nurseıitpen jolyǵyp, 5 naýryzda ótken jarystaǵy kóńil-kúıi týraly blıs-suhbat alǵan edi. Sondaı-aq, Ǵabıt Tursynbek te osy oqıǵa týraly óz oıyn aıtyp berdi.
Aıbek Nurseıit: Ǵabıt ekeýmiz jarysta baýyrlyqty birinshi qoıdyq
- Men «Álem faiters» sport klýbynda jattyǵamyn. Qytaıda ótken keshegi jarys meniń kásipqoılar arasyndaǵy alǵashqy jarysym, shetelde de alǵashqy jarysym edi. Onda jerebe barysynda men eń birinshi fransýzdyq sportshymen Mıhaıl (Michel) Daýbaıspen tústim. Al, Ǵabıt baýyrymyz ýkraındyq sportshymen shyqty. Biz fransýzdy jeńip, ol ýkraındyq sportshyny jeńip, ekeýmiz aqtyq márede kezdestik. Sol kezde kezdeskende, «sonaý ózge elde, Qytaı sıaqty jat jerde eki qazaqtyń bir-birimen kózin shyǵaryp qyrqysqany jigittikke erlikke jatpaıdy» dep oıladym. Óıtkeni ol meniń baýyrym! «Nege? Sport bolǵan soń bolady ǵoı» dep jatady kóbi. Biraq, óz elimizde, Qazaqstanda tájirıbe almasý maqsatynda bir-birimizben jekpe-jekte bolamyz. Másele kózin shyǵarý, uryp-soǵýda emes. Biraq, biz úshin alyp aıtqanda «shetelde júrgen» Ǵabıt baýyrymyzdyń da elge oralyp, Kók týdy jelbiretkisi keletini anyq. Onyń da baýyrmal ekeni menmundalap tur. Bir-birimizge qol jumsaı almadyq.
Ózderińiz kórgendeı, biz erejege saı qarsylaspaǵan soń tóreshi eskertý berdi. Sóıtip ekinshi raýndta bizge qyzy kartoshka kórsetip, jarystan shyǵaryp tastady. Sharshy alańǵa shyqqanda aldymen men shyqtym, ol da Bekbolat aǵamyzdyń ánimen shyǵyp kele jatqan kezde júregim tebirendi. Bastalǵan kezde ol da aqyryn urady, men de nuqyp qoıam. Bir-birimizge qolymyz batpaıdy. Bul jarys edi, ortada tigilgen qanshama aqsha, ataq pen abyroı belbeý bar edi. Solaı bolsa da biz baýyrlyqty birinshi qoıdyq. Qazaqtyń kim ekenin kórsin dedik. Álem tanyp, WBK versıasynyń prezıdenti de kórip tańǵalyp jatty. Bankette qazaq pen qazaqty qoımaımyz dep kúlisip jatty. Qoldap jatqan, aq tilekshi bolǵan barsha otandastarǵa, qandastarǵa alǵysymdy aıtamyn. Aman bolyńyzdar!
Ǵabıt Tursynbek: Bir belbeýge bola eki qazaq bir-birimizli sabap jatqanymyz jaramas edi
Men Shyńjańda Qulja qalasynda turamyn. 1993 jyly týǵanmyn. Erte jastan osy jekpe-jek sport túrlerine qyzyǵyp óstim. Biraz myqty aǵalarymyzdyń tárbıesin aldyq. Qazaqy rýhty tárbıeniń arqasy dep bilemin osy jetistikterimniń bárin. Osy ýaqytqa deıin kásibı alańda 18 kezdesý ótkizip, onyń 15-inde jeńiske jetippin.
Al, keshegi WBK jarysy týraly aıtsam, onda jekpe-jekke shyǵatyn juptar jerebe arqyly anyqtaldy. Aıbekti tanysam da, bul maıdanda birge kezdesemiz degen oıym bolǵan joq. Alańǵa shyǵatyn 4 sportshy ózara jerebe arqyly jup qurdyq. Aıbek fransıalyq sportshy Maıkl Dýboıspen, men ýkraınalyq sportshymen shyǵatyn boldym. Aıbek fransýzdy, men óz qarsylasymdy jeńip, nátıjesinde bir-birimizben kezdesetin boldyq. Alańǵa shyqqanda jarys erejesi boıynsha bir-birimizge soqqy jasaýymyz tıis bolsa da qol kótere almadyq. Tarıhtan bilemiz, qazaqtyń batyrlary eshqashan bir-birine qol kóterip, soqqyǵa jyqqan jaǵdaı bolǵan emes. Osylaı baýyrmaldyq pen tatýlyqtyń úlgisin kórsetken. Qanda bar sol qasıet osy alańda da kórinis berdi dep oılaımyn. Aıbek te men de soqqy jasaýǵa qolymyz barmady. Onyń ústine burynnan tanystyǵymyz bar. Jaqsy jigit, adal dos, myqty sportshy ekenin ilemin.
Aqshaǵa bola, ataq-abyroıǵa, bir belbeýge bola bir-birimizdi sabap jatqanymyz jónsiz bolar edi. Osy sheshimge alań ústinde keldik. Biraz, aqparat quraldary eki sportshy aldyn ala kelisip alǵan degendeı aıtyp jatyr eken. Onyń esh negizi joq. Bizdiń kezdesýimiz kezdeısoqtyq boldy. Aıbektiń de bul saıysqa kelýi kezdeısoqtyq edi. Sondyqtan, eki qazaqtyń alańda jolyǵyp, bir-birine qol jumsamaýyn tek baýyrmaldyq, tegine tartýshylyq dep túsiný kerek.
Erlan Tóleýbaı
