Búgin jalǵasqan eks-premer Serik Ahmetovtyń apelásıalyq sotynda aıyptaýshylar alǵashqy sot ınstansıasynyń úkimin ózgerissiz qaldyrýdy surady, - dep habarlaıdy «Qamshy» portaly Informbúroǵa silteme jasap.

Apelásıalyq sotta barlyǵy 12 aıyptalýshynyń shaǵymy qaralýda. Búgin túski saǵat úshte bastalǵan sot otyrysynda prokýrorlar shaǵym boıynsha qorytyndyny oqydy. Bul qorytyndy keshe oqylýy tıis bolǵan. Alaıda, aıyptalýshylardyń advokattary jasaǵan málimdemelerge baılanysty búginge qaldyrylǵan edi.

Prokýrorlar aıyptalýshynyń keltirilgen shyǵyn somasyn qaıtarǵanyna qaramastan Ahmetov pen basqa da aıyptalýshylardyń jazasyn ózgerissiz qaldyrýdy surady.

«Úkim ózgerissiz, qorǵaýshylardyń apelásıalyq shaǵymy qanaǵattyndyrýsyz qaldyrylsyn. Úkimdi ózgertýge sebep bolatyn qylmystyq-prosessýaldyq kodeksti buzý belgileri anyqtalmady. Aıyptalýshylardyń kinálary dáleldendi. Aıyptalýshylar men qorǵaýshylardyń pikirleri alǵashqy sot ınstansıaásynda tyńdalyp, zerdelendi jáne jetkiliksiz dep tanyldy», - deıdi memlekettik aıyptaýshy tarap.

Sondaı-aq, prokýrorlar úkimnen eki sottalýshy – Qaraǵandy ákiminiń burynǵy orynbasary Aıdar Telǵarın men «Saryarqa» ÁKK» ulttyq kompanıasynyń burynǵy departament basshysy Erlan Qısyqovtyń múlkin tárkileýdi alyp tastaýdy surady.

Apelásıalyq alqa 14 naýryz kúni atalǵan is boıynsha qaýly qabyldaıtyny belgili boldy.

Esterińizge salsaq, Qazaqstannyń burynǵy Premer-mınıstri S. Ahmetov 10 jylǵa bas bostandyǵynan aırylyp, sot múlkin tárkileý týraly sheshim shyǵarǵan edi. Ahmetovten basqa Qaraǵandy oblysynyń burynǵy ákimi Baýyrjan Ábdishev, Qaraǵandy qalasynyń burynǵy ákimi Meıram Smaǵulov, taǵy birneshe laýazymdy tulǵa kináli dep tanylyp, túrli merzimdegi jazaǵa tartyldy.

Apelásıalyq alqa otyrysynyń aldynda S. Ahmetovtyń týystary men dostary qylmystyq áreketter saldarynan keltirildi degen shyǵyn – 2,2 mlrd teńgeni qaıtarǵany belgili boldy.