Búgin túnde Reseıde bolǵan ushaq apatynyń lańkestikpen baılanysy joqtyǵy aıtylýda, - dep habarlaıdy «Qamshy» portaly RIA Novostı – ge silteme jasap.

RF tergeý komıteti Dondaǵy Rostovta qulaǵan «Boıng-737-800» ushaǵynyń apatyna sebep bolýy múmkin jaǵdaılardy atady. Ázirge Reseı taraby ushaqtaǵy tehnıkalyq aqaýlar, kún raıynyń qolaısyzdyǵy men ushaq ekıpajynyń qateligin yqtımal sebepter retinde aıtyp otyr.

«Apattyń túrli sebepteri qarastyrylýda. Olardyń ishinde ekıpaj músheleriniń qateligi, ushaqtyń tehnıkalyq aqaýy nemese kún raıynyń qolaısyzdyǵy, taǵy basqa jaǵdaılar ushaqtyń qulaýyna sebep bolýy múmkin. Osy apat boıynsha qylmystyq is qozǵalyp, tergeý júrgizilýde», - deıdi RF Tergeý komıtetiniń resmı ókili Vladımır Markın.

Qazirgi ýaqytta apat ornynan ushaqtyń eki birdeı «qara jáshigi» tabylǵan. Apatty zertteý jumystaryna BAÁ, AQSH jáne Fransıa sarapshylary da jumyldyrylmaq. Jeksenbi kúni Rostov oblysynda osy apatqa oraı qaraly kún jarıalanady.

Esterińizge salsaq, búgin Astana ýaqytymen 06.50-de Dondaǵy Rostov áýejaıyna qoný sátinde Flydubai áýe kompanıasyna tıesili Boeing 737-800 jolaýshylar ushaǵy apatqa ushyraǵan bolatyn. Ushaq bortyndaǵy 61 adam túgel qaza tapqan.