Búgin elimizde kezekten tys Parlament májilisi men máslıhat depýtattarynyń saılaýy ótýde. Barlyǵy 9 mln 791 myń 165 qazaqstandyq saılaýǵa qatysý quqyǵyna ıe ekeni buǵan deıin baspasózde habarlandy. Májilis saılaýyna alty saıası partıa qatysýǵa ótinish berse, túrli deńgeıdegi máslıhat depýtattyǵyna 10825 úmitker tirkelgen.

Tań sáriden ashylǵan saılaý ýchaskelerinde daýys berýshiler qarqyny túske deıin óte joǵary deńgeıde bolǵan. Ortalyq saılaý komısıasy tústen keıin, saǵat 16.00-de saılaýshylardyń 71 paıyzy óz tańdaýlaryn jasap úlgergeni habarlandy. Saıası uıymdar men kandıdattardyń, resmı oryndardyń tarapynan saılaý barysyna qatysty, ondaǵy zań buzýshylyqtar týraly resmı málimdeme jasalmaǵanymen, saılaý ýchaskelerine bas suqqan jýrnalıser men qarapaıym azamattar áleýmettik jelide saıası sharanyń zańsyzdyqtardan ada emestigin jazýda.

Bul derekterge qatysty Bas prokýratýra ókili Nurdáýlet Súıindik túsinik berip, resmı baqylaýshylar men saıası uıymdar, naqty úmitkerler tarapynan shaǵym túspegenin, áleýmettik jelilerdegi álgindeı vıdeolar men jazbalar kóp jaǵdaıda rastala bermeıtinin aıtty.

«Árbir saılaý prosesi barysynda biz jelidegi mundaı habarlardy baqylap otyramyz. Birinshi kezekte, saılaý barysyn úmitkerler men saıası partıalar ózderiniń senimdi ókilderi men baqylaýshylary arqyly baqylaıtynyn aıta ketý kerek. Qoǵamdyq birlestikter tarapynan baqylaý júrgizý tetikteri bar, halyqaralyq baqylaýshylar bar. Iaǵnı, saılaý barysyn baqylaý tetikteri jetkilikti deńgeıde rettelgen jáne zańnamalarda engizilgen. Sondyqtan mundaı jaǵdaılarda biz osy resmı tulǵalardyń shaǵymdaryna nazar aýdaratyn bolamyz. Búginde biz Astana jáne Kókshetaý qalalary boıynsha saılaý búletenderin úshinshi tulǵalarǵa berý, bir adamǵa birneshe búleten berý oqıǵasy boıynsha eki habarlama alyp otyrmyz. Bul aqparatty qazir tekserip jatyrmyz», - deıdi ol.

Sondaı-aq, Bas prokýratýra ókili OQO-daǵy bir saılaý ýchaskesinde máslıhat depýtattyǵyna úmitker ýchaskege kelip, ózin órtep jiberýge árekettengenin aıtyp otyr. Qadaǵalaýshy organ ókili saılaý prosesi aıaqtalmaǵandyqtan, atalǵan oqıǵa boıynsha ázirge tolyq aqparat berý múmkindigi joqtyǵyn jetkizdi.

Alaıda, jýrnalıser men qoǵamdyq belsendiler Almaty, Atyraý, Oral, taǵy basqa qalalarda saılaý týraly zań talaptarynyń buzylǵanyn, bir saılaýshyǵa birneshe búleten berilý oqıǵalaryn rastaıtyn vıdeolar jarıalaýda.

Sondaı-aq, Oral qalasyndaǵy №447 saılaý ýchaskesinde kolej, JOO stýdentterin oqý ornyna tirkeýge qoıyp, toptap daýys bergizý oqıǵasy týraly da vıdeo jarıalanyp otyr.

Saılaýshylardyń daýys berýi 20.00 saǵatqa deıin jalǵasady. OSK búgin saǵat 22.30-da saılaýshylardyń daýys berýi týraly aldyn ala málimetterdi jarıalaýy tıis.

Jomart Abdollauly