Valúta naryǵyna qatysty ekiushty pikirler áli tyıylmaı otyr. Eldiń bir toby aqpan, naýryz aılaryndaǵy ulttyq valútanyń az-maz bolsa da nyǵaıýyn Májilis saılaýymen baılanystyryp, saıası naýqan aıaqtalyp, eldegi saıası ómir qalypty arnaǵa túsken soń, shetel valútasy áli de qymbattaıtynyn aıtsa, basqalary álemdik naryqtaǵy munaı baǵasynyń ósýi teńgeniń dollarǵa shaqqandaǵy baǵamynyń nyǵaıýyna oń yqpal etti dep sanaıdy.
Al, «Asyl-Invest» kompanıasy taldaý departamentiniń dırektory Aıvar Baıkenov bolsa, ulttyq valútanyń dollarǵa shaqqandaǵy baǵamynyń ósýine Ulttyq bank ózi kedergi bolyp otyr dep sanaıdy. Ol bul oıyn «Kapıtal» isker aqparat ortalyǵyna bergen suhbatynda aıtqan.
«Bizdiń oıymyzsha, Ulttyq bank qazir teńgeniń nyǵaıýyn ustap otyr. Esepterge súıensek, sońǵy birneshe apta boıy dollar baǵamy 330-335 teńge aýmaǵynda turýy kerek bolatyn. Iaǵnı, Brent markaly munaı baǵasynyń barreli 40 dollar deńgeıinde turǵany eskerilýi tıis. Rúbldiń de dollarǵa shaqqandaǵy baǵamy 68 rúbl bolyp otyr. Eger, sońǵy úsh aıdaǵy dollar men rúbl baǵamyna qarasaq, teńgeniń dollarǵa qatysty baǵamy Ulttyq bank aralaspasa endigisi 323 teńge bolǵan bolar edi», - deıdi ol.
Aıvar Baıkenov teńgeni Ulttyq bank «Úkimettiń qysymymen» tejep otyr dep sanaıdy.
«Ulttyq bank áreketteri túsiniksiz bolyp otyr. Bylaı qarasaq, byltyr Qazaqstan erkin valúta naryǵyna kóshti. Al, is júzinde erki aınalym tek teńgeniń quldyraý baǵytynda ǵana júrip otyr. Al, teńge nyǵaıa bastasa Ulttyq bank aralasyp, ony tejeıdi. Bul menińshe, Úkimet tarapynan jasalǵan qysym saldarynan bolyp otyrǵan sıaqty. Óıtkeni, 2016 jylǵa arnalǵan búdjette dollar baǵamy 300 emes, 360 teńge bolady dep josparlanǵan. Makroekonomıkalyq kórsetkishterdiń ońalýyna baılanysty Úkimet búdjetti qaıta qaraýǵa qulyqsyz. Teńgeniń nyǵaıýy kerisinshe, jaǵymsyz senarı retinde qarastyrylýda», - degen pikirde A. Baıkenov.
Sonymen qatar, ol Ulttyq banktiń qazir shetel valútasyn satyp alǵanymen, saýdaǵa shyǵarmaı otyrǵanyn aıtady. Onyń aıtýynsha, aqpan aıynda iri kólemde shetel valútasyn satyp alǵan Ulttyq bank naýryzda da sol raıynan qaıtpaıtyn sıaqty.
Jomart Abdollauly
