Bek Air áýe kompanıasynyń Astana áýejaıyna apatty jaǵdaıda qonǵan "Fokker-100" ushaǵynyń ekinshi pıloty Vadım Smerechanskıı oqıǵa jaıly baıandady, - dep habarlaıdy «Qamshy» portaly Tengrinews.kz – ke silteme jasap.

Smerechanskıı qoný kezinde ýaıymdaýǵa da ýaqyttyń bolmaǵanyn, emosıanyń ushaq jerge qonǵanda ǵana týlap qoıa bergenin aıtty.

"Biz qonǵaly jatqan kezde shasıdiń ashylmaǵanyn eskertetin dabyl qosyldy. Sodan biz shasısiz qonýǵa bel býdyq. (...) Biz ár jarty jyl saıyn daıyndyqtan ótemiz, beıstandart prosedýralardy ótkeremiz, sondyqtan biz daıyn boldyq. Biraq oqıǵa shyn máninde óz ómirińde bolyp jatqanda bári basqasha. Men mundaı jaǵdaıǵa birinshi ret tap boldym. Ózime keletin bolsam, oqıǵa kezinde ýaıymdaýǵa ýaqytym bolmady, sebebi ushaq ushyp bara jatty, jyldam sheshim qabyldaýǵa týra keldi. Ýaıym ushaq jerge qonǵanda bastaldy. Biraq bul ýaıym barlyǵynyń tiri ári aman-esen bolýyna qatysty qýanysh boldy", - dedi pılot.

Ol bul áýe kompanıasynda 2014 jyldan beri jumys isteıtinin, azamattyq avıasıa akademásyn bitirgen 2009 jyldan bastap ushyp júrgenin aıtty. Smerechanskııdiń aıtýynsha, ol avıasıany kásip etken januıada dúnıege kelgen, onyń atasy Dinmuhamed Qonaevtyń jeke pıloty bolǵan eken. 

"Bizde januıa dınastıasy, atam - ushqysh, ákem pılot, men de úshinshi urpaqpyn. (...) Bala kezimde atammen birge ushatynmyn, biraq ákemmen kóp ushtym, qarap, úırenip, avıasıalyq januıada óstim, áńgimemiz tek ushaq jaıynda bolatyn. Birinshi synyptan bastap pılot bolýdy armandadym", - dedi ol.

Osyǵan deıin Bek Air áýe kompanıasynyń "Fokker-100" ushaǵynyń komandıri Dmıtrıı Rodın shasıi joq ushaqty qalaı qondyrǵany jaıly aıtyp bergen bolatyn. 

Eske sala keteıik, keshe Bek Air áýe kompanıasynyń Qyzylordadan ushyp kelgen ushaǵy Astana áýejaıynda apatty jaǵdaıda qonǵan bolatyn. Ushaq aldyńǵy shasısiz qonǵan. Oqıǵa saǵat 10.30-da boldy. Aıta keteıik, apatty jaǵdaıǵa baılanysty áýejaı jumysyn saǵat 13.00-ge deıin toqtatty. Sonymen qatar, komandır men ekinshi pılot úkimettik syılyqqa usynylmaq.