Búgin Almaty qalalyq İİD-niń baspasóz qyzmeti qaladaǵy Evangelıa senimindegi hrıstıandardyń «Jańa ómir» shirkeýinen qarý-jaraq pen oq-dári tabylǵany týraly habar taratty. Bul týraly «Qamshy» portaly habarlaıdy.
Buǵan deıin shirkeý pastorlaryna kelýshilerden zańsyz aqsha jınaǵan, qarjy jymqyrǵan degen kúdik týǵany týraly habarlanǵan edi. Osyǵan oraı Almaty polıseıleri shirkeý basshylaryn Qylmystyq kodekstiń 190-baby 3-bólimi 1-tarmaǵy (İri kólemdegi alaıaqtyq) boıynsha tergeýge alǵan bolatyn.
Atalǵan shirkeýdiń quqyqqorǵaý organdary nazaryna ilingeni bir búgin emes kórinedi. Ótken jyldyń shilde aıynda Almaty ishki ister organdaryna Evangelıa senimindegi hrıstıandardyń «Jańa ómir» shirkeýiniń bes birdeı kelýishisi shaǵym túsirip, shirkeý pastorlaryn qaıyrymdylyq arqyly túsken iri kólemdegi qarajatty, jyljıtyn, jyljymaıtyn múlikterdi jymqyrdy, alaıaqtyqpen aınalysty dep aıyptaǵan kórinedi.
Tergeý sharalary barysynda qala polıseıleri 25 naýryz kúni sot sanksıasymen «Evangelıa Senimindegi Hrıstıandarynyń «Jańa ómir» Shirkeýi» dinı birlestiginiń keńsesinde jáne shirkeý basshylarynyń úılerinde tintý júrgizgen.
Tintý nátıjesinde qarjylyq-ekonomıkalyq qyzmetke baılanysty birshama qujattar tabylyp, arnaıy saraptamaǵa jiberilgen.
Sondaı-aq, Almaty qalalyq İİD baspasóz qyzmeti tintý kezinde tirkelmegen qarý-jaraq pen oq-dári tabylǵanyn habarlap otyr. İİD baspasóz hatshysy Saltanat Ázirbek quqyqqorǵaý organdarynyń azamattardyń shaǵymy boıynsha júrgizgen tergeý sharalaryn shirkeýdiń keıbir jaqtaýshylary teris sıpatta baǵalap, áleýmettik jeliler arqyly osy isti dinı sebeptermen qýǵyndaý dep málimdep jatqanyn aıtady.
«Quqyqqorǵaý organdarynyń azamattardyń shaǵymy negizinde olardyń zańdy quqyqtary men múddelerin qorǵaý úshin júrgizgen sharalary áleýmettik jelilerde dinı sebeptermen baılanystyrylyp túsindirilýde. Sondaı-aq, polısıa tintý kezinde dinı ádebıetter men uıym qorynan aqsha tárkilendi degen jalǵan aqparat taraýda. Polısıa mundaı aqparattyń shyndyqqa janaspaıtynyn habarlaıdy jáne jalǵan aqparat taratqany úshin Qylmystyq kodekstiń 274-baby boıynsha qylmystyq jaýapkershilik qarastyrylǵanyn eskertedi», - deıdi ol.
Bul oqıǵa osyǵan deıingi keıbir saıası toptar men aqparat quraldary arqyly qoǵam sanasyna sińirilip kelgen «Dinı birlestikter men uıymdar qyzmetinde kinárat shyqsa tek musylman qaýymdastyqtarynan shyǵady, qarý asynsa tek ıslam dinin ustanýshylar asynady, lańkes tek musylmandar qatarynan shyǵady» degen túsiniktiń jalǵan ekenin, lańkestik pen alaıaqtyqtyń dini bolmaıtynyn taǵy bir dáleldegendeı.
Jomart Abdollauly
