«Astana EKSPO-2017» ulttyq kompanıasynyń burynǵy basshysy T. Ermegıaevtiń júrgizýshisi ári oqqaǵary bolǵan Saıat Nádirbaev burynǵy basshysyna qarsy kýállik bergen, - dep habarlaıdy «Qamshy» portaly.

Tergeý barysynda kúdiktilerdiń telefonmen áńgimelesýleri men basqa da materıaldardy Jemqorlyqqa qarsy is-qımyl jónindegi Ulttyq búro aqparat quraldaryna jarıalap otyr.

Jemqorlyqqa qarsy qyzmet ókilderine T. Ermegıaevtiń qylmystyq sqemasyn S. Nádirbaev ótken jyldyń jazynda-aq aıtyp bergen kórinedi. Qarjy polıseıleri EKSPO aınalasyndaǵy qylmystyq sqemalardyń birazyn osy S. Nádirbaevtiń moıyndaýlary arqyly anyqtaǵan. Alaıda, basshysyna qarsy kýálik bergen júrgizýshi keıin ushty-kúıli joǵalyp ketedi. S. Nádirbaev 28 naýryz kúni Almaty qalasynda qaıtadan quryqtaldy. S. Nádirbaevtiń kózden tasa bolýyn tergeýshiler kúdikti T. Ermegıevtiń isi dep otyr. Olardyń aıtýynsha, S. Nádirbaevti negizgi kýáger retinde kúdiktiniń ákesi Amangeldi Ermegıaev Almatydaǵy tanystarynyń kómegimen birneshe aı boıy jasyryp kelgen.

Osy is boıynsha S. Nádirbaev jáne ony jasyrýdy uıymdastyrǵan N. Moldashev pen S. Erejep Almaty qalasyndaǵy ýaqytsha ustaý ızolátorlarynyń birine qamaldy.

Esterińizge salsaq, memleket qarjysyn jymqyrdy degen aıyp taǵylǵan «Astana EKSPO-2017» ulttyq kompanıasynyń burynǵy basshysy T. Ermegıaev pen onyń sybaılastarynyń isi boıynsha sot otyrystary Astanada 18 naýryzda bastalǵan bolatyn. Olarǵa 10 mıllıard teńgeden astam memleket qarjysyn jymqyrdy degen aıyp taǵyldy.