Qaraǵandy oblysyndaǵy Nura-Sarysý baseıniniń Tómengi Narbaq sý qoımasynda bógen jaryldy, - dep habarlaıdy «Qamshy» portaly Azattyqqa silteme jasap.

Qaraǵandy oblystyq tótenshe jaǵdaılar departamentiniń habarlaýynsha, 4 sáýirge qaraǵan túngi saǵat úshter shamasynda Shet aýdanynda Nura-Sarysý baseıniniń Tómengi Narbaq sý qoımasyndaǵy plotına jarylǵan.

TJD aımaqtaǵy eldi mekenderdi sý basý qaýpi joq dep otyr.

Bógenniń buzylýynan Qyzylorda-Pavlodar jolynyń 796 shaqyrymynda joldyń 5-6 metr tusyn sý basqan. Jolda barlyq kólik túriniń qozǵalysyna shekteý qoıylyp, arnaıy beket ornalastyrylǵan.

Sý qazir Jańaarqa aýdanyndaǵy Sarysý ózeni ańǵarynda ornalasqan Bıdaıyq sý qoımasyna aǵyp jatqan kórinedi. Oblystyq tótenshe jaǵdaılar qyzmeti artyq sýdyń budan ary tabıǵı jolmen Sarysý ózeniniń ańǵaryna ketetinin aıtqan.

Budan basqa 3 sáýir kúni oblysta 2 úı jáne Qaraǵandy qalasyndaǵy aýlalardń birazy sý astynda qalǵan.

Sondaı-aq, búgin tańǵy saǵat 8 shamasynda Shet aýdany Shopa eldi mekeninde Sherýbaı-Nura ózenininiń sý beketinde sý deńgeıi kóterilgeni belgili bolǵan. Soǵan qaramastan, mamandar eldi mekenderdi sý alý qaýpi joq dep otyr.