Búgin Astanadaǵy mamandandyrylǵan aýdanaralyq qylmystyq ister jónindegi sotynda «EKSPO-2017»UK» AQ burynǵy basshysy Talǵat Ermegıaevtiń isine qatysty birinshi sot otyrysy bastaldy. Búdjet qarajatyn talan-tarajǵa saldy dep aıyptalyp otyrǵan eks-basshynyń isi boıynsha sotty bolǵan 23 aıyptalýshynyń 14-i tolyǵymen óz kinásin moıyndady, - dep habarlaıdy «Qamshy» portaly today.kz – ke silteme jasap.

Otyrys barysynda sýdıa aıyptalýshylardan olarǵa taǵylyp otyrǵan aıyptar boıynsha kinásin moıyndaıtynyn-moıyndamaıtynyn surady: 12 fıgýrant, olardyń arasynda "Astana EKSPO-2017"UK" AQ Basqarma tóraǵasynyń burynǵy konsýltanty Qajymurat Úsenov,  "SHM+Architects" JSHS eks-dırektory Shoqan Mataıbekov, "Rona LTD" JSHS jobalyq kompanıasynyń basqarýshysy Oral Ibadildına, "Southfork ltd." JSHS dırektory Seıit Seıitov, "Southfork ltd." JSHS bas dırektory Nurlan Aqpambetov, "Qurylys Konsaltıń" AQ ókili Serik Naızabekov, "Kompanıa ADKS" JSHS eks-prezıdenti Mars Shormanov, "ADS kompanıasy" JSHS quryltaıshysy Alpysbek Tilekmetov, "Petrospek" JSHS dırektory Erlan Tileýov, jalǵan kásiporyndar jelisin uıymdastyrǵan Sergeı Ilın, sondaı-aq qarajatty qolma-qol aqshaǵa aınaldyryp otyrǵan Samat Sardarbekov pen Talǵat Saǵyndyqov kinásin tolyǵymen moıyndap, óz isterine ókinetinderin jetkizdi.

Taǵy eki fıgýrant – "Astana EKSPO-2017" UK AQ "EKSPO qurylysynyń dıreksıasy" fılıalynyń eks-dırektory Vácheslav Págaı, T.Ermegıaevtiń senimdi ókili Renat Aqylbaev kinásin jarym-jartylaı moıyndady.

Osylaısha atyshýly qylmystyq istiń 23 fıgýrantynyń 14-i kinásin moıyndap otyr. Aıta ketsek, bas aıyptalýshy Talǵat Ermegıaev ózine taǵylǵan aıypty joqqa shyǵaryp, kinásin moıyndaýdan bas tartty.

Esterińizge salyp ótsek, EKSPO-2017 tóńiregindegi aqsha jymqyrýǵa qatysty qylmystyq is bes epızodtan turady, qylmystyq is materıaldary 540 tomdy quraıdy.