Búgin aqparat quraldary parlament depýtattarynyń qyzmet ornynda smartfondar paıdalanýyna tyıym salynǵany týraly jarysa habarlady. Bul talap ótken aıdyń sońynda memlekettik mekeme qyzmetkerleriniń qyzmet ornynda gadjetter ustaýyna tyıym salý týraly bastamanyń jalǵasy ispettes bolyp otyr. Esterińizde bolsaq, budan burynyraq túrli mınıstrlikter ózderiniń baǵynyshty organdaryna qyzmettik mekemelerde smartofn ustaýǵa tyıym salatyn qyzmettik hattar joldaǵan bolatyn. Soǵan qarap «Parlament te memlekettik organ. Sol sebepten depýtattar da smartfon ustamasyn» deı salýǵa bolar edi. Alaıda, «Deı salǵyzbaıtyn» bir másele bar.
Konstıtýsıa boıynsha Parlament – bıliktiń óz aldyna táýelsiz bir tarmaǵy. Oǵan negizinen zań shyǵarý mindeti artylady. Sondaı-aq, depýtattar atqarýshy bıliktiń jumysyna baǵa berip, birqatar kadrlyq taǵaıyndaýlarda sheshýshi daýys ıelenedi. Demek, Úkimetten bastalyp, jergilikti memlekettik atqarýshy organdar, quqyq qorǵaý organdarynda engizilip jatqan bul tyıym parlament qabyrǵasyna qalaı ótip ketti? Zań shyǵarýshy organǵa talap qoıatyn zańdy kimder shyǵaryp otyr? Bul konstıtýsıaǵa, «Parlament jáne onyń depýtattarynyń mártebesi týraly» zańǵa qaıshy emes pe?
Alaıda, qyzmetterine jańadan kirisken depýtattardyń «Bularyń qalaı?» degeni bolmady. Barlyǵy derlik bas shulǵyp, quptaı jóneldi.
Tek, komýnıser atynan saılanǵan depýtat Aıdyn Qońyrov qana «Bizdi eshkim shekteı almaıdy. Ol úshin konstıtýsıalyq zańdarǵa ózgeris engizý kerek shyǵar. Biraq, bizge áli ondaı zań jobalary túsken joq. Al, kópshilik smartfon ustamaý kerek dese,b iz oǵan baǵynamyz. Biraq, men óz basym depýtattardyń smartfonyn alyp qoıǵanyna qarsymyn» degen boldy.
Sonda deımiz de, eshqandaı zańǵa ózgeris engizbeı, zań shyǵarýshy myrzalarǵa basyn ashyp túsindirmeı, depýtattardyń qolyndaǵy telefonyna jarmasyp otyrǵan qandaı kúsh? Buryn el arasynda qaýqarsyzdyǵyna qaraı «Qýyrshaq parlament», depýtattyq korpýstyń basym bóligin bıznesmenderdiń quraýyna oraı «qaltaly parlament» atalyp kelgen depýtattyq korpýsqa endi jasyryn kúshterdiń myna shekteýinen keıin «smartfonsyz parlament» degen laqap taǵyla ma? Úkimettiń basshysyn aýystyrý bylaı tursyn, salalyq mınıstrlikter ázirlep ákelgen zań jobalaryn «lám-mım» demesten maquldap jiberetin «tártipti» parlamentte qandaı qaýqar qaldy ózi?
Darhan Muqantegi
