Búgin QR Joǵarǵy sotynyń tóraǵasy Qaırat Mámı Saıası-zań komısıasynyń hatshysy, Qytaı kompartıasy Ortalyq komıteti saıası búrosynyń múshesi Men Szánchjýmen kezdesti. Sondaı-aq, ol Beıjiń qalasynyń Joǵary dárejeli halyq sotynda da boldy, - dep habarlaıdy «Qamshy» portaly QazAqparatqa silteme jasap.
«Kóshbasshylarymyzdyń basa nazar aýdarýynyń arqasynda búginde Qazaqstan men Qytaı - senimdi áriptes, dostas el. QHR Tóraǵasy Sı Szınpın men QR Prezıdenti Nursultan Nazarbaev arasynda tyǵyz jumys baılanystary ǵana emes, sonymen birge jyly dostastyq qatynas ornaǵan. Men eki eldiń joǵarǵy halyq sottary arasynda birlesken kúshpen eki eldiń sot júıeleri jumysynyń sapasyn arttyrý úshin turaqty tájirıbe, aqparat almasý (onyń ishinde Shanhaı yntymaqtastyq uıymy aıasynda) júrgiziletinine senimdimin», - dedi Men Szánchjý.
Ol eki el arasynda ortaq qaýipsizdik syn-qaterleri (terorızm, transshekaralyq qylmys jáne t.b.) turǵanyn atap ótti, bul osy salada ózara is-qımyldy kúsheıtýdi talap etedi.
«Elder arasynda ádil sot salasyndaǵy yntymaqtastyqty nyǵaıtý týraly, sottalǵan tulǵalardy ózara qaıtarý týraly kelisimge qol qoıyldy. Ótken jyly Qytaı Qazaqstannyń ótinishi boıynsha oǵan QHR aýmaǵynda túrli merzimdegi jazalaryn ótep júrgen qylmyskerlerdi qaıtardy», - dedi ol.
Q. Mámı terorızm, ekstremızm, separatızm sıaqty úsh qaýippen kúres salasyndaǵy isterdi qaraý tájirıbesin ózara zerdeleý, sondaı-aq eki eldiń joǵarǵy sottary yntymaqtastyq týraly barynsha keńeıtilgen memorandýmǵa daıyndyq týraly ýaǵdalastyqqa jetý mańyzdylyǵyn atap ótti.
QR Joǵarǵy sotynyń sýdıasy Madıar Balken qazaqstandyq jýrnalıserge bergen suhbatynda Qazaqstan men Qytaıda sot-quqyqtyq reformalar uqsas ekenin atap ótip, sapar qorytyndysyn shyǵardy.
«Biz eki el joǵarǵy sottarynyń yntymaqtastyǵyn odan ári tereńdetý máselelerin talqyladyq. Qytaıda da, Qazaqstanda da óte aýqymdy quqyqtyq reforma bastaldy. Biz eki elde de barlyq baǵyt boıynsha mindetter men maqsattar sáıkes keletinin kórip otyrmyz. Bul jaǵynan tájirıbe almasýdy tereńdetý, sot praktıkasyn zerdeleý, jańa tehnologıalar men standarttardy engizý, sot bilimin damytý, sondaı-aq tutastaı, ádil sot júrgizýdiń sapasyn jaqsartý boıynsha ýaǵdalastyqqa qol jetkizildi», - dedi ol.
Eske salsa ketsek, bul QR Joǵarǵy soty tóraǵasynyń QHR-ǵa alǵashqy resmı sapary. 11 sáýirde Q. Mámı QHR Memlekettik sot akademıasyna, QHR Joǵarǵy halyq sotyna bardy. Onda Tóraǵa Chjoý Sánmen tanysty.
Qazaqstandyq delegasıa quramyna Joǵarǵy sot sýdıasy Madıar Balken, Aqmola oblystyq sotynyń tóraǵasy Nurǵazy Ábdiqanov, Batys Qazaqstan oblystyq sotynyń tóraǵasy Bek Ametov, Joǵarǵy sot janyndaǵy sottar qyzmetin qamtamasyz etý departamenti basshysynyń orynbasary Ásıa Qasenova men halyqaralyq baılanys jáne hattama bóliminiń bas konsýltanty Nurysh Tasbolatov kirdi.
