Ál-Farabı atyndaǵy Qazaq ulttyq ýnıversıtetinde «Flagman» baǵdarlamasy: deńgeılik sertıfıkasıa formatyndaǵy tildik daıyndyq» halyqaralyq ǵylymı-ádistemelik konferensıasy ótti, - dep habarlaıdy «Qamshy» portaly.
AQSH-tyń memlekettik «Flagman» bilim berý jobasy ekinshi oqý jyly qatarynan amerıkandyq stýdentterge ál-Farabı atyndaǵy QazUÝ-da orys tilinde kúndelikti qarym-qatynas ornatýdyń múmkindigin usynyp otyr. Fılologıa jáne álem tilderi fakúltetinde akademıalyq utqyrlyq baǵdarlamasy boıynsha Vıskonsın, Kalıfornıa, Oregon, Pensılvanıa jáne t.b. shtattardan kelgen stýdentter bilim alýda.
Halyqaralyq bilim berý boıynsha amerıkandyq keńestiń prezıdenti (ACCELS), profesor Den Devıdson: «Flagman» baǵdarlamasy basshylarynyń ál-Farabı atyndaǵy QazUÝ-dy tańdaý sebebi meılinshe anyq: QazUÝ-da orys tili boıynsha teorıalyq, oqý jáne ádistemelik jumystary bar álemdik deńgeıdegi ǵalymdardyń, orys tiliniń bilikti oqytýshylarynyń tájirıbeli ujymy qyzmet etedi», – dep pikir bildirdi.
Ál-Farabı atyndaǵy QazUÝ-dyń birinshi prorektory Muhambetqalı Búrkitbaev «Flagman» bilim berý baǵdarlamasynyń óte sátti júrgizilip jatqandyǵyn, amerıkandyq stýdentterdiń dáristerge qatysyp, oqý toptarynda bilim alyp júrgendikterin, mamandyqtary nemese qyzyǵýshylyqtary boıynsha speskýrstar tyńdap, óndiristik praktıka barysynda da belsendilik tanytatyndyǵyn atap ótti.
«Flagmandyq stýdentterdiń óndiristik praktıkalary ártúrli mekemeler men uıymdarda ótedi. Men praktıka kezinde orta mektepte boldym: «tarıh» páni boıynsha sabaq júrgizip, muǵalim qyzmetiniń jaýapkershiligin túsindim. Bizge berip jatqan bilimderi úshin Qazaq ulttyq ýnıversıtetiniń oqytýshylaryna alǵys bildiremin», – deıdi Marısa Irvın.
Ál-Farabı atyndaǵy QazUÝ profesory, fılologıa ǵylymdarynyń doktory Eleonora Súleımenova: «Amerıkandyq stýdentter mektepterde sabaq ótip, mádenı sharalar ótkizedi, murajaılarda jumys jasaıdy, orman sharýashylyǵynda seleksıonerlerge kómektesedi, Bıologıa jáne bıotehnologıa máseleleri, Ekologıa máseleleri ǵylymı-zertteý ınstıtýttarynda ǵylymı-zertteý jumystaryn oryndaıdy, «İskerı Qazaqstan» jáne «Aıqyn» gazetteriniń redaksıalarynda qyzmet etedi», – dedi.
«Flagman» baǵdarlamasy aıasynda amerıkandyq stýdentter qazaq tili men mádenıetin oqýǵa erekshe mán berýde. Bul múmkindiktiń túrki tilderi men túrki mádenıetiniń keń álemine jol salatyndyǵyn flagmandyqtar jiti túsinedi. Konferensıada amerıkandyq stýdentter «Kózimniń qarasy» jáne «Sulý qyz» ánderin qazaq tilinde oryndady.
ACCELS-tiń aǵylshyn tildilerge arnalǵan qazaq tili boıynsha tanymal oqytý baǵdarlamasynyń bastamashysy jáne daıyndaýshysy bolǵandyǵyn aıta ketý kerek: «Central Asian News Broadcasts» jáne «Windows on Central Asian Culture» on bir modýldik veb-kýrstyń eki serıasy daıyndaldy. Veb-kýrs únemi jańaryp, jetildirilip otyrady. Osy veb-kýrstyń arqasynda qazaq tilin úırenýge nıettiler jıyrma jyl boıy tegin bilim alyp keledi.
Ál-Farabı atyndaǵy QazUÝ ACCELS-tiń shetelde qazaq tilin qoldap, qazaq tili men mádenıetin zertteýge qyzyǵýshylyq tanytqan tulǵalardy oqý materıalymen qamtamasyz etý barysyndaǵy eńbegin erekshe baǵalaıdy. QazUÝ qazirgi qoǵamnyń stýdenttik jastary arasyndaǵy úshtildik saıasatty qoldaıdy jáne úshtildik bilim berýdiń sátti úlgisin kórsetip keledi.
