Elimizdiń Syrtqy ister mınıstri Erlan Ydyrysov Astanada ótip jatqan Eýrazıalyq medıa forým jumysy barysynda Qazaqstan halqyn Qyrymdaǵy demalys oryndaryna barýdy qoıa turýǵa shaqyrdy. Mınıstr osyndaı málimdeme jasaı otyryp, «Bir-birin aıamaǵan baýyrlas eki el qazaqty qaıtsin!» degendi astarlap bolsa da jetkizip otyr. Túsingen adamǵa, árıne.

«Bizdiń azamattar bir-birine qarama-qaıshy baýyrlas eki eldiń birin jaqtaıtyn sheshim qabyldaýǵa májbúr bolady. Jaz aılarynda olar demalý úshin basqa jaǵrapıalyq núktelerdi tańdaǵany durys sıaqty. Eger kimde-kim Qyrymǵa baram dep tabandap turyp alsa, ol jerge jetýdiń baǵytyn bul mańyzdy máseledegi eki taraptyń da pozısıasyn eskere otyryp tańdaýy qajet. Buǵan salmaqty túrde, jan-jaqty oılanyp qaraý kerek. Qyrym aýmaǵyna barǵanda eshqandaı qıyndyq týmaýyn oılastyrý qajet», - deıdi Erlan Ydyrysov myrza.

Mınıstr medıa forýmdaǵy baıandamasynda Qazaqstannyń eki baýyrlas el Reseı men Ýkraına arasyndaǵy aqparattyq qaqtyǵystyń nysanyna aınalǵanyn atap ótti.

«Bizdiń qoǵam túsiniksiz jaǵdaıda qaldy jáne ne isteý kerektigin bilmeıdi. Bir jaǵynan Reseı barlyq qajetti jaǵdaılar jasalǵanyn aıtyp otyr. Ekinshi jaǵynan Ýkraına Qyrym aýmaǵyna Reseı jaqtan kirý memlekettiń saıasatyna qarsy dep málimdeýde. Biz elimizdiń aýmaǵy baýyrlas eki halyq pen memlekettiń arasyndaǵy aqparattyq básekelestińtiń nysanyna aınalǵanyn ókinishpen málimdeımiz. Bul máselede qandaı da bir keńes berý qıyn. Qyrym máselesi halyqaralyq turǵyda qarapaıym másele emes, onyń halyqaralyq quqyqqa qatysty astary bar. Ol máseleni jáne Qazaqstan sheshpeýi kerek. Bul tyǵyryqtan shyǵýdyń basqa da formattary bar. Biz osyǵan baılanysty reseılik ustanymdy da bilemiz, Ýkraınanyń da ne aıtyp jatqanyn estip otyrmyz. Biz osy eki el halyqaralyq quqyq aıasynda osy tarıhı jáne saıası kúrdeli máseleni sheshýi kerek dep sanaımyz», - degen mınıstr Qazaqstannyń bul máselede beıtaraptylyq tanytatynyn ańǵartty.

Buǵan deıin Ýkraına tarapy Reseı arqyly Qyrymǵa kiretinderdi zańsyz shekara buzdy dep aıyptap, jaýapqa tartatyndaryn habarlaǵan edi. Osy maqsatta eldegi týrısik fırmalarǵa Qyrymǵa joldama satýdy doǵarý týraly talap ta qoıdy.

Reseılik dıplomattar ýkraındyq áriptesteriniń bul talaptaryn aqparattyq shabýyl dep baǵalasa, týrısik fırmalardyń basshylyǵy Qyrymǵa kimge tıesili ekeni ózderin qatty qyzyqtyrmaıtynyn bir-aq aıtty. Paıda tabýdy kózdeıtin týrısik fırmalar úshin mundaı tarıhı, saıası sıpaty bar máseleler mańyzdy emes, árıne. Alaıda, jaz shyǵa sala teńiz jaǵalap ketetin halyqtyń qaýipsizdigi men eldiń halyqaralyq qaýymdastyqtaǵy bedeli syrtqy ister vedomstvo basshysyn beı-jaı qaldyrmaıtyny anyq. Erlan Ydyrysov myrzanyń buǵyp jatyp almaı, osy daýly máselege qandaı bolsa da pikir bildirgeni, onyń ústine, el azamattaryn saqtandyrǵany quptarlyq is ekeni daýsyz.