Nursultan Nazarbaev búgin ózi týraly túsirilgen «Elbasy joly» kınoepopeıasynyń qorytyndy bólimi «Juldyzdar toǵysqanda» fılminiń tusaýkeserine qatysty, - dep habarlaıdy Qamshy.kz.

Elbasy fılmniń premerasyn kórý úshin «Qazaqstan» ortalyq kınozalyna bardy. Fılm Mádenıet jáne sport mınıstrliginiń tapsyrysy boıynsha túsirilgen. Rejıseri ári senarısi – RF Memlekettik syılyǵynyń ıegeri, Reseıdiń halyq ártisi Sergeı Snejkın.

Prezıdentpen birge premerany parlament depýtattary, premer-mınıstr Kárim Másimov pen vıse-premer Darıǵa Nazarbaeva bastaǵan úkimet músheleri de tamashalady.

«Bul men úshin de, meniń áriptesterim úshin de erekshe tájirıbe boldy. Álemde kózi tiri adam týraly kórkem fılm túsirgen basqa rejıser joq. Munyń barlyǵyn «Keremet adam týraly hıkaıat» deýge bolady», - deıdi kartına rejıseri Sergeı Snejkın.

Fılmniń sújettik jelisi boıynsha, aǵylshyn jazýshysy Djeremı Vılson N. Nazarbaevtyń ómirbaıanyn jazý úshin onymen kezdesedi. Alaıda, josparlanǵan suhbat memlekettiń qalyptasýy týraly áńgimege ulasady. Vılson 1950,1989,1986,1991 jyldarǵa sapar shegedi. Jýrnalıs Nursultan Nazarbaev eske alatyn oqıǵalardyń kýágeri hám qatysýshysyna aınalady.

Epopeıanyń sońǵy qorytyndy bóliminde Elbasynyń rólin akter Berik Aıtjanov somdaıdy. Onyń aldyndaǵy bólimderde prezıdent rólin somdaý baqyty akter Nurlan Álimjanovqa buıyrǵan edi. Prezıdenttiń qyzdarynyń rólinde Qarlyǵash Muhamedjanova men Dınara Baqtybaeva oınaıdy.

Jalpy, «Juldyzdar toǵysqanda» fılmine memleketten 1,2 mıllıard teńge qarajat bólingen. Budan bólek kartınany túsirýge demeýshilerdiń de qarajaty tartylǵan.

«Elbasy joly» kınoepoeıasyna buryn túsirilgen «Balalyq shaǵymnyń aspany», «Otty ózen», «Temir taý» jáne «Tyǵyryqtan jol tapqan» fılmderi engen edi.