Tirshilik kózinen taryqpas úshin sýdy amalsyz arnaıy kólikpen úılerine tasyp ishýge kóshken. Óıtkeni, qala bıligi «Keńsaı» yqshamaýdanyna áli kúnge sý qubyryn júrgizbepti, - dep habarlaıdy KTK arnasy.

«Keńsaı» turǵyndary kúndelikti tirshiligin sý toltyrýdan bastaıdy. Tań atysymen báriniń saryla kútetini sý ákeletin mashına. Tek, úıinde sý quıyp alatyn ydys bolmaı qalsa, erteńge deıin sýsyz otyrýǵa májbúr.

Osy kólik bolmasa, mańaıdyń bári tirshilik nárin tatýdan qalady. Aýyr tehnıkanyń shlangasyn aýlasyna súırep ákelý ásirese, shal-shaýqanǵa qıyn. Buǵan kórshiler de úırengen. Sý kelgende bári úılerinen shyǵyp, qart kisilerge kómektesip, molynan quıyp alýǵa tyrysady.

-Osy kósheniń kárisimin. Balalarym jumysta. Sý alý maǵan qalady. Ázir qartaıdym. Shlangany kóteretin shamam joq, qysqasyn aıtqanda. Myna jastar jumys isteıdi. Bular jumysqa ketip qalsa, vodovoz keledi de bular ol kúni sý ala almaıdy. Sýdyń jetpeý sebebi de sol, - deıdi turǵyn Ákim Zeınahýnov.

Mundaǵy jurt aýlasynda azyn-aýlaq jemis-jıdek ósirý degendi de umytqan. Tek, kúndelikti sháı-sýy men ydys-aıaǵyna ázer jetkizip otyrady. Aıtýlarynsha, turǵyndardyń osylaı qınalyp júrgenderine 40 jyldan asqan.

-73-jyldan beri turamyn. Odan beri 43 jyl boldy. Mine, sodan beri vodovozben ǵana sý ishemiz. Ortalyq qala Almatynyń ózinde 21 ǵasyrda sýsyz ómir súrý degen qandaı qıyn jaǵdaı?! Árıne, keıbir kezde qystyń kúni sý kelmeı qalady, jetpeı qalady, - deıdi Raıhan Nurahmetova.

Keńsaılyqtar shaǵymyn aıtyp, qaıta-qaıta aryz jazsa da ákimdiktegilerden áli kúnge qaıyr bolmapty. Otyz qaraly tútinniń qashanǵy osylaı otyrary da belgisiz. Qyryq jyldan beri qaıyr kórsetpegenderden biz de bir jóndi jaýap ala almaı qoıdyq.