Ońtústik Qazaqstan oblysy Saıram aýdanynyń 28 jastaǵy turǵyny Rabıaı Shermetova tórt birdeı nárseteni dúnıege ákeldi. Óńirde birden tórt sábı týý sońǵy on jylda alǵash ret oryn alyp otyr, dep habarlady OQO Densaýlyq saqtaý basqarmasy bastyǵynyń orynbasary Saltanat Jabaǵıeva.

Tórt náreste 11 naýryz kúni jaryq dúnıe esigin ashqan. Eń birinshi bolyp 1500 gr salmaqpen Fatıma esimdi qyz bala týdy. Onyń artynan Hasan (1590 gr), Zýhra (1200 gr) dúnıege keldi. Tórteýdiń sońǵysy Zahra 1490 gram salmaqpen týdy. Anasy men balalardyń jaǵdaıy birqalypty deıdi dárigerler. Akýsher dáriger Gúljanat Baızaqovanyń aıtýynsha, endi balalarǵa kútim kórsetýdiń ekinshi kezeńine aýysý josparlanýda. Balalar anasynyń sútimen qorektenýde, biraq olar salmaqtary tym az bolýyna oraı qosymsha tamaqtandyrylyp jatyr. R.Shermetovanyń 7 jasar uly bar eken. «ÝDZ qursaǵymda tórt sábı bar ekenin kórsetkende, joldasym basynda shoshyp ketkenmen, artynsha qatty qýandy. Balalardyń tórteý ekenin júktiliktiń ekinshi aıynda bildim. Kóterý ońaı bolmady, jatyrymda isik boldy, sondyqtan da aýyr soqty», - deıdi kóp balaly ana. R.Shermetova aýrýhanaǵa 11 naýryz kúni túsken. «Birneshe náreste kóterip júrgendikten, oǵan shuǵyl ota jasaldy, tehnıkalyq qıyndyqtar bolǵan joq», - deıdi akýsher-gınekolg. Náresteler 6 kún jan saqtaý bóliminde bolǵan, al qazir analarynyń janynda.

QazAqparat