Sońǵy aıdaǵy halyqty alańdatqan basty másele – jer daýy bolǵanyna eshkim shúbá keltirmes. Keı sheneýniktiń shalaǵaı sharýasy jer taǵdyryn báıgege tigip, onyń arty jalpy halyqtyq tolqýlarǵa ulasyp kete jazdady.
Buqaralyq aqparat quraldary, saıasatkerler, zıaly qaýym men óner juldyzdarynyń bir bóligi, jastar qozǵalystary bastaǵan úlken kúsh jerdi saýdaǵa salatyn zańǵa engen ózgeristerge óre túregeldi. Atyraý bastap, Aqtóbe qostap, birneshe qalada narazylyq mıtıńteri ótti. Onysy orynsyz da emes. Halyq Assambleıasynyń jıynynda Elbasy N. Nazarbaev jer úshin shyr-pyr bolǵan aq júrek halqynyń aq nıetine rızashylyǵyn bildirgeni esimizde.
«Aǵaıynǵa rızamyn. Laıym jerge degen kóńil osyndaı bolsa, halqymyz qasyq qany qalǵansha ony qorǵaıdy dep senemin», – degen bolatyn sol kezde Memleket basshysy.
Prezıdent Assambleıa sesıasynda, Bas prokýratýrada ótkizgen jıynda laýazymdy tulǵalarǵa zań normalaryn halyqqa jiti túsindirýdi, jerdiń eshbir sheteldiktiń menshigine ótpeıtinin uqtyrýdy qadap turyp tapsyrdy. Óńirlerge de depýtattardan quralǵan túsindirý toptary attandy. Alaıda, senimine selkeý túsken halyqtyń olardyń «túsindirýlerine» ılana qoıýy da ekitalaı edi. Sońǵy birer kúnde ótken osyndaı kezdesýlerden keıin osyndaı oıǵa keldik.
«Qamshy» portaly da eldi alańdatqan máseleden beıtarap qalmady. Ár kún saıyn oqyrmanǵa jer taqyrybyn ózek etken ótkir maqalalar jarıalap, salmaqty saraptamalar usynýǵa tyrysty. Elmen birge boldy. Sondaı maqalalardyń birinde osy jer daýynyń jaı-japsaryn aıta kelip, tolǵaýly máseleniń túıinin boljaǵan bolatynbyz.
«Áıteýir eń basty baılyǵymyz – táýelsiz Qazaqstan ekenin esti qazaq biledi. Endeshe dál qazirgi jaǵdaıdy tynyshtandyrý úshin qaıtpek kerek? Jol – úsheý.
- «Jerdi jeleý» etip tolqyǵan halyq «Amerıkalyq arandatýshylardyń» kesirinen «Qazaq kóktemin» jasap, táýelsizdigin qoldan beredi.
2. «Jer kodeksine» túsinistikpen qarap, barlyq jaýapkershilikti Elbasyna artady. Erteń shekaradan attaǵan árbir qytaı men jer ıelengish orys úshin sol kisi jaýap beredi. Eger mundaı jaǵdaı bola qalsa, erteń táýelsizikti qorǵaý búgingiden de qıyndaı túsedi.
3. Elbasy halyqtyń shynaıy ókilderin jınap (meıli ol opozısıa, meıli ultshyl, meıli arandatýshy...), arnaıy keńes ótkizip, «Jer kodeksine» tıisti ózgerister engizedi nemese núkte qoıady» dep jazǵanymyzdy qadirli oqyrman qaýym umyta qoımaǵanyn bilemiz.
Elbasy da eliniń oıyndaǵysyn uǵyp, úshinshi joldy tańdady. Búgin Aqordada ótken keńeıtilgen Úkimet otyrysynda jer tóńiregindegi daýǵa sebep bolǵan birneshe laýazymdy tulǵaǵa eskertý jasap, bir mınıstrdi orynbasarymen birge qyzmetinen bosatty. Halyqpen keńespeı, eldiń pikirin eskermeı ázirlengen «Jer kodeksindegi» shýly ózgeristerge maratorıı jarıalady.
«Elge eshqandaı aýylsharýashylyq jeri satylmaıtynyn túsindirý kerek edi. Sondyqtan munda spekýlásıa boldy. Iaǵnı, tıisti toptarǵa bul normalar tolyq jetpedi. Alaıda, zańdy qabyldaý men normalary qoǵamda talqylaýǵa túspedi, adamdardyń qaýiptenýi, dabyl qaǵýy aqtaldy. Eger bizdiń azamattar muny túsinbese, qabyldanǵan sheshimderge senimsizdik tanytsa, ıaǵnı, bul durys bolmaǵany. Biz barlyǵyn adamdar úshin jasap otyr emespiz be? Iaǵnı, qoǵamda osy máselege qatysty zańnamalarǵa engen ózgeristerge kúdik týdy», - dedi Elbasy osy máselege núkte qoıǵan búgingi jıynda.
Eldi alańdatqan máselede Elbasy ádettegideı eldiń oıyndaǵysyn aıtyp, ult kóshbasshysyna tán danalyq tanytty. Sóıtip, el jerdi qorǵasa, Elbasy eldi qoldady.
