Kásipqoı boksta «Qazaq» degen atpen tanymal Qanat Islam kásibı alańdaǵy kezekti jıyrma birinshi kezdesýin 28 jastaǵy boksshy Hýan de Anxelmen ótkizip, 6-raýndta qarsylasyn texnıkalyq nokaýtqa jiberdi.
Kolýmbıalyq boksshy Qanattyń oń judyryǵynyń aýyr soqqysyn alǵashqy raýndta-aq alyp úlgerdi. Ekinshi raýndta az-maz belsendilik tanytqan De Anxeldiń kúshi odan árige jetpedi. Úshinshi raýndta Qanattyń sol qolymen búıirden soqqan soqqysy da ońaıǵa soqpady. Besinshi raýndta bir eseńgirep es jıǵan Hýannyń qýanyshy kópke sozylmady. Altynshy raýndta Qanattyń nokaýtymen aıaqtaldy.
Esterińizge salsaq, jekpe-jek aldynda qos boksshy salmaq ólshetip, onda Qanattyń salmaǵy 152,8 fýt, Hýan de Anxeldiki 154,2 fýtty quraǵan bolatyn. Osy rette kolýmbıalyq kásipqoı boksshy Hýannyń da qur júrgen jan emestigin aıta ketý kerek. Kásipqoı boksta 22 kezdesý ótkizgen ol onyń 18-in jeńispen aıaqtaǵan. 17 nokaýnd avtory.
Alaıda, Sport sarapshylary baǵalaǵan bul artyqshylary Hýandy Qanatpen kezdesýde qýanta qoımady. Jekpe-jek aldynda da jerlesimizdiń bul kezdesýdi de jeńispen aıaqtaıtynyna eshkimniń kúmáni bolmaǵanyn aıta ketý kerek.
Qanattyń kásipqoı bokstaǵy qazirgi bapkeri ári menedjeri Nelson Lopes kezdesý aldynda boksshy týraly: «Qazaqstanda dál qazir GGG birinshi bolsa, al Qanat Islam onyń artynan erip keledi»,-degen bolatyn. «Qazaqstanda Qanat Islam óte tanymaldylyqqa ıe jáne myńdaǵan jankúıerleri jeterlik. Qanat Qazaqstanda turyp jatqanyna 6 jyldaı boldy, biraq bizben birge jattyǵýda», - deıdi N. Lopes. «Qanat Islamdy álem chempıony Genadıı Golovkın(160), buryn álem chempıony bolǵan Vasılıı Jırov (200), Beıbit Shúmenov(175) jáne jeńilis kórmegen Sergeı Lıpınes (147) sekildi qazaq sarbazdarymen salystyrýǵa bolady. Olar barlyǵy baýyr sekildi. Qanat shyndyǵynda olardy baqylap otyrady. Dál qazir Qazaqstanda GGG birinshi bolsa, Qanat onyń artynan erip keledi.Bizge shyndyǵynda jeńis kerek jáne osy jeksenbi jeńisti kúnde jolyǵamyz degen oıdamyz" - deıdi ol. «Qanat 147 jáne 154 fýntqa ońaı túsedi.Ol Golovkınmen shyǵý kerek bolsa 160 fýntqa deıin barady. Biraq, bul jekpe-jek bolatyn bolsa sońǵy jekpe-jekteri bolýy múmkin.Ol úshin tanylyp, sýperjuldyz deńgeıine deıin jetý kerek dep oılaımyn. Árıne, bári ýaqyttyń enshisinde».
Qanatty qanatynyń astyna alǵan - Qazaqstanǵa tanymal mesenat, kásipker Baýyrjan Ospanov. Sportqa, onyń shinde boksqa janashyr jigit aǵasy Qanatty Qytaıda júrgen kezinde elge aldyryp, úı-jaıyn rettep, bokspen aınalysýyna barynsha jaǵdaıyn jasady. Daralanyp, dańqyn shyǵarý úshin emes, qazaq elinen qazaq boksshysyn, qazaq chempıonyn shyǵarý úshin. Talaı baıraqty básekede qarjylaı demeý kórsetip, Qanattyń sporttaǵy karerasynda bıikterdi baǵyndyrýyna sep boldy.
Baýyrjan Ospanov, kásipker: Qanat múmkindik bolsa Qazaqstannyń atynan barsa degen oı bolǵan. Eger oǵan bara almaı jatsa, kásipqoı boksqa jarap turǵan jigit. Sol jerde qoldaımyn degenmin. Olımpıadaǵa ózderińiz bilesizder óte almaı qaldy. Qytaı eline qaıta shaqyryp edi barǵan joq. Óıtkeni ol sózin ustaıtyn jigit. Elge keldim, eldiń atynan ǵana shyǵamyn dedi.
Qanatty qanattandyrǵan bapkerdiń biri – Nurlan Aqurpekov. Onyń aıtýynsha, Qanat Islamnyń boıyndaǵy qajyr-qaırat ekiniń birinde joq. Ásiresi onyń tehnıkasy shapshań. Eki qolymen de jaqsy bokstasady. Bapkerdiń aıtýynsha Qanattyń boıynda qaınaǵan namys pen qajyrly qaırat ony tek chempıon bolýǵa jeteleıdi.
Nurlan Aqúrpekov, «Astana Arlans» klýbynyń bas bapkeri: Onyń soqqylary óte aýyr jáne ózine soqqy jibermeı, shapshań qımyldaıdy. Onyń tájirıbesi jetkilikti. Ol qazir naǵyz babynda. Endi Qanat Islam bizdi tek qana jeńisimen qýantady dep senemin. Boks maıtalmandary Qanattyń kúsh-qýatyn jaqsy biledi. Onyń osy jolǵy qarysylasy da qolyna endi qolǵap kıgen boksshy emes. 28 jastaǵy Hýan De Anhel de qazir daıyndyq ústinde. Qazir eki myqtynyń saıysy týraly boljam kóp. Ermahan Ybyraıymov, Olımpıada chempıony: Qanattyń soqqylary Genadıı Golvkınniń soqqylary sıaqty óte aýyr. Ár soqqysyna jeke kóńil bóledi. Aldyńǵy djebimen ol óziniń qarsylasyn ábden sharshattyrady. 6-shy nemese 7-shi raýndta Qanat Hýan de Anheldi nokaýtpen jeńedi degen senimimiz bar. Sondyqtan, alǵa Qazaqstan, alǵa Qanat Islam!
Serik Sápıev, Olımpıada chempıony: Qanatqa búkil Qazaqstan jankúıer bolady. Biz oǵan senemiz. Endi nokaýtpen jeńedi dep oılaımyn. Qanatty bilemin. Ol ábden daıyndaldy. Onyń soqqysy óte myqty. Qanattyń úzeńgilesteri men jankúıerleri odan tek jeńis kútti. Úlken sportta jeńiske bergisiz jeńilister men baıany joq jeńister bolady. Baǵy men baby kelispese shashasyna shań juqpaǵan shyn júırik te sharasyzdyqqa shalynady. Bul kezdesýde Qanattyń baby men baǵy qatar shapty. Jeńis qutty bolsyn, aǵaıyn!
Aıta keteıik, Qanat Islam men Hýan De Anhel arasyndaǵy jekpe-jek bolyp tabylatyn reıtıńtik boks keshi AQSH-tyń Florıda shtatyndaǵy Leıklend qalasynda ótti.
