Májilis depýtattary sheteldik ofshorlarǵa qatysty oılaryn bildirdi, - dep, - habarlaıdy Qamshy.kz Tengrinews.kz – ke silteme jasap.

9 mamyr kúni Halyqaralyq zertteýshi jýrnalıser konsorsıýmy (ICIJ) Mossack Fonseca zańgerlik kompanıasynyń 200 myńnan astam klıentteri týraly málimetterdi jarıalaǵan bolatyn. Ol málimetter ishinde Qazaqstan azamattary men olarǵa tıesili ofshorlyq kompanıalar da bar. Qazaqstandyq ofshor ıeleri týraly málimetterdi myna silteme arqyly oqı alasyzdar.

Al, Májilis otyrysynda «Aq jol» fraksıasynyń depýtaty Azat Perýashev osy ofshor máselesine qatysty premer-mınıstr atyna depýtattyq saýal joldady.

«Bizdiń partıa Qazaqstannan aqshanyń ofshorlyq zonalarǵa ketý máselesiniń ózektiligin 2012 jyly 3 sáýirde, 25 qyrkúıekte, 2014 jyly 15 qańtarda, 2015 jyly 13 mamyrda depýtattyq saýal etip joldaǵan. Al, 2014 jyly 16 sáýirde biz Úkimetten Qazaqstan ekonomıkasyn ofshorsyzdandyrý boıynsha sharalar qabyldaýdy usynǵan edi», - degen ol mundaı ofshorlyq zonalarǵa aqsha shyǵarý arqyly memleket qazynasynan qarjy jymqyrýǵa jol ashylatynyn, sondyqtan da, ofshorǵa qatysy bar kompanıalarǵa memlekettik qoldaý kórsetýdi, olardyń memlekettik satyp alýlar konkýrsyna qatysýyn shekteýdi usyndy.

«Biz tapqan paıdasyn ofshor arqyly syrtqa shyǵaryp otyrǵan kompanıalar memlekettik baǵdarlamalardyń, salyqtyq jeńildikterdiń, memlekettik sýbsıdıalardyń qoldaýyn, basqa da jeńildikterdi paıdalanbaýy kerek dep sanaımyz», - deıdi depýtat.