Almatyda esirtkige táýeldi jandardyń sany ótken jylmen salystyrǵanda orta eseppen 15 paıyzǵa azaıǵan, -deıdi medısınalyq áleýmettik túzetý narkologıalyq ortalyǵynyń bas dárigeriniń orynbasary Rýslan Álıev aıtty. 

«Almatyda bıyl 1 naýryzda ótken jylǵy kórsetkishpen salystyrǵanda esirtkige táýeldi jandardyń sany orta eseppen 15 paıyzǵa azaıǵan. Bıyl olardyń sany 34013 adam bolsa, onyń ishinde ashshy sýǵa táýeldi adamdardyń sany - 30318, nashaqorlar -3601, toksıkomandardyń sany 31 adamdy qurady. Áıelder arasynda alkogólge táýeldi - 2811, esirtkige táýeldi - 430 adam tirkelgen. Jasóspirimder arasynda 965 bala alkogólge táýeldi bolsa, 8 balanyń esirtki paıdalanatyny, 4 bala toksıkoman ekendigi anyqtaldy», - dedi Rýslan Álıev. Mamannyń aıtýynsha, qaladaǵy esirtkige táýeldi jandardyń sanynyń azaıýyna birneshe faktor áser etip otyr. Olardyń biri - aýdandyq ákimshilikter janyndaǵy arnaıy komısıalardyń, quqyq qorǵaý organdarynyń, múddeli uıymdardyń, narkologıalyq ortalyqtyń, salaýatty ómir saltyn qalyptastyrý ortalyǵynyń belsendi profılaktıkalyq is-sharalarynyń arqasynda bolyp otyr. «Esirtkige táýeldi jandardyń sanyn azaıtý máseleleri memlekettik «Salamatty Qazaqstan» baǵdarlamasy aıasynda keńinen qarastyrylǵan. Sondaı-aq, aımaqtyq «2012-2016 jyldarǵa arnalǵan nashaqorlyq pen narkobızneske qarsy kúres» baǵdarlamasyn júzege asyrý aıasynda ótkizilgen kóptegen sharalar nashaqorlardyń sanynyń azaıýyna yqpal etip otyr», - dedi medısınalyq áleýmettik túzetý narkologıalyq ortalyǵynyń bas dárigeriniń orynbasary Rýslan Álıev.

Qazaqparat