Másimov jer reformasy jóninde Komısıa jumysynyń el jurtshylyǵy úshin mańyzdylyǵyn aıtty, - dep habarlaıdy Qamshy.kz Tengrinews.kz –ke silteme jasap.

Keshe QR premer-mınıstri Kárim Másimovtiń tóraǵalyǵymen ótken Úkimettiń kezekti otyrysynda jer reformasy boıynsha Komısıa qurý týraly Memleket basshysy Nursultan Nazarbaevtyń tapsyrmasyn iske asyrý barysy qaraldy. 

Úkimet basshysy aqparat jáne komýnıkasıalar mınıstrligine Komısıa jumysynyń buqaralyq aqparat quraldarynda jarıalanýyn uıymdastyryp, óńirlerde tıisti aqparattyq jumystardy júrgizýdi tapsyrdy.

Atalǵan másele boıynsha QR premer-mınıstriniń birinshi orynbasary - Komısıa jetekshisi Baqytjan Saǵyntaev baıandady.

Komısıa quramyna Parlament májilisi men senatynyń depýtattary, Úkimet músheleri, saıası partıalardyń, agrobıznestiń, salalyq qaýymdastyqtardyń ókilderi, ǵalymdar jáne azamattyq belsendiler kiredi.

Sonymen qatar, óńirlerdi de kóptep qamtý úshin Komısıa jumysyna qoǵamdyq keńester de tartylatyn bolady.

Sondaı-aq, otyrysta Komısıa jumysyn uıymdastyrý máselesi boıynsha QR aýyl sharýashylyǵy mınıstri Asqar Myrzahmetov pen QR aqparat jáne komýnıkasıalar mınıstri Dáýren Abaevtyń habarlamalary tyńdaldy.

Komısıanyń saıası partıalarmen, qoǵamdyq uıymdarmen jáne óńirlermen ózara is-qımyly týraly "Nur Otan" partıasy tóraǵasynyń birinshi orynbasary Muhtar Qul-Muhammed, Komısıa jumysyndaǵy Ulttyq kásipkerler palatasynyń roli týraly "Atameken" UKP basqarma tóraǵasy Abylaı Myrzahmetov sóz sóıledi.