Búgin «EXPO -2017» isi boıynsha ótip jatqan sotta «Astana EXPO -2017» ulttyq kompanıasynyń burynǵy basshysy Talǵat Ermegıaev sóz aldy, - dep habarlaıdy Qamshy.kz.

Basty aıyptalýshy sot otyrysy barysynda óz komandasynyń Astana kórmesin EXPO tarıhyndaǵy eń úzdik kórme etýdi josparlaǵandaryn aıtqan.

«Biz, quramynda bas hatshy Lossertales, Hýan Koreras, halyqaralyq keńesshiler bar komısıa EXPO-2017 kórmesin taqyrypty ashý, kórme ótkennen keıingi qoldaný, týrıser tartý, qatysýshylar qataryn arttyrý boıynsha mamandandyrylǵan kórmeler tarıhyndaǵy úzdik kórme etýdi josparladyq. Ol kezde eshkim kórmeni qalaı uıymdastyrý kerektigin naqty bilmedi. Ony biz tek sátti ótetin is-shara dep qana emes, ótkennen keıin de ózin aqtaıtyndaı etip oılastyrdyq», - dedi T. Ermegıaev halyqaralyq kórmege daıyndyqtyń alǵashqy kezeńi týraly.

«Qazir bir qaraǵanda baıqalmaıtyn máseleler bar. Qajetti baılanystar men syrttaǵy kásibı mamandardyń kómeginsiz barlyǵyn atqarý múmkin emes», - dep málimdedi bas aıyptalýshy.

Esterińizge salsaq, Astana qalasynyń qylmystyq ister boıynsha mamandandyrylǵan soty bir aıdan artyq ýaqyt boıy «Astana EXPO-2017» ulttyq kompanıasy basshylary men birqatar laýazymdy tulǵaǵa qatysty qylmystyq isti qarap jatyr. Sotta 23 adamǵa aıyp taǵylyp, onyń 14-i búginde óz kinálaryn moıyndaǵan.