Jer reformasy boıynsha komısıanyń alǵashqy otyrysynda «Atameken» Ulttyq kásipkerler palatasy basqarma tóraǵasynyń orynbasary, komısıa múshesi Nurjan Áltaev jerdi menshigine alyp, jumys isteımin degen Qazaqstan azamattaryna eshqandaı moratorıı kedergi bolmaýy kerektigin aıtty, dep habarlaıdy Qamshy.kz QazAqparatqa silteme jasap.

«Jer máselesi halqymyz úshin barynsha ózekti ekendigi sózsiz. Óıtkeni bul bizdiń týyp-ósken ata-qonysymyz. Biraq, sonymen birge sol jerdi biz eń aldymen halyqtyń ıgiligine paıdalanýymyz kerek. Bolashaqta tek qana munaı-gaz emes, munan bólek eldiń ál-aýqatyn kóteretin, ekonomıkamyzdy aıaqqa nyq turǵyzatyn eń birinshi kezekte aýyl sharýashylyǵy bolmaq», - dedi N.Áltaev.

Osy rette ol búgingi kúni palataǵa Reseıdiń alty oblysynan úlken suranys túskenin, olar aı saıyn et, sút ónimderin, kókónisterdi úlken somaǵa alýǵa daıyn ekendikterin bildirgenin aıtty. Máselen, ótken jyly Reseı men Qytaı 4 mlrd. dollarǵa sıyr etin tasydy. Al, Qazaqstan bolsa syrtqy naryqtardan 3 mlrd. dollarǵa aýyl sharýashylyǵy ónimderin satyp alǵan. Onyń tek 900 mln. dollary ǵana ekzotıkalyq jemis jıdekke ketse, qalǵan soma óz jerimizde de ósirýge bolatyn aýyl sharýashylyǵy ónimderin satyp alýǵa jumsalǵan.

«Osynyń aıasynda memleketimizdiń myqty ekonomıkasyn qurý úshin jerdi ıgerip alamyn deıtin Qazaqstan azamattaryna menshikke berýimiz qajet. Jerdi jumys isteımin deıtin azamattar da ony óz menshigine alýy tıis. Oǵan eshqandaı moratorıı kedergi bolmaýy kerek», - deıdi ol.