39 jastaǵy Chalbasov Nurlan almatylyqtardy qymbat kólik áperemin dep aldap, 31 mln teńgesin qoldy etken, dep habarlaıdy Qamshy.kz qalalyq İİD baspasóz qyzmetine silteme jasap.

Bostandyq aýdandyq İİB tergeý bólimi habarlaǵandaı, kúdikti shetelden qymbat kólik tasýmen aınalysatyn jeke kásipkerlik ashqan. Óziniń qyzmeti úshin ol kólik qunynyń 70 paıyzyn aldyn ala alyp otyrǵan. Osylaısha ańqaý turǵyndardan 31 mln 200 myń teńge jınap alǵan.

«2016 jyldyń aqpanynda ol Qazaqstan-Reseı shekarasynda ustaldy. Jalǵan qujatpen shetel aspaq bolǵan. Onyń kompanıasy syrtqy ekonomıkalyq qatynastardyń qatysýshysy retinde kedendik organdarda tirkelmegeni anyqtaldy. Iaǵnı, ol o bastan kólik ákelýdi emes, adamdardyń senimine kirip aqsha tabýdy oılaǵan. Eger onyń áreketinen japa shekken azamattar bolsa, 254-47-62; 254-47-02 nómirlerine habarlasýyn ótinemiz», -  dedi Bostandyq aýdandyq İİB tergeý bóliminiń tergeýshisi Azamat Nurbolatov.

Qazir kúdikti İİD ýaqytsha ustaý oqshaýlaǵyshynda otyr. Tergeý amaldary jalǵasýda.