Parlament májilisinde ótken úkimet saǵatynda eldiń bas polıseıi Qalmuhambet Qasymov jergilikti polısıa qyzmetine qatysty baıandamasynda turǵyndardyń polısıa qyzmetine kóńili tolmaýy oryndy ekenin aıtty, - dep habarlaıdy Qamshy.kz Azattyqqa silteme jasap.

«Qylmystyq jaǵdaıǵa bótenniń múlkin urlaý kádimgideı áser etip otyr. Ol qylmystyń 60 paıyzyn quraıdy, al keı aýdandarda kórsetkish odan da joǵary. Múlik urlyǵynyń kópshiligi jeńil jáne orta dárejedegi qylmystar: uıaly telefondardy urlaý, kólik tonaý, qalta urlyǵy jáne taǵy basqa. Biraq turǵyndardyń kópshiligi osy qylmys túrlerinen zardap shegip otyr. Biz ázir múlik urlyǵymen kúreste jaǵdaıdy ózgerte almaı otyrmyz. Azamattarymyzdyń polısıanyń osy baǵytyndaǵy jumysyna kóńili tolmaýynyń sebebi bar», - deıdi Qalmuhambet Qasymov.

Resmı derek boıynsha, jyl basynan ishki ister organdaryna 740 myń quqyq buzýshylyq jaıynda ótinish pen shaǵym túsken. Onyń 130 myńǵa jýyǵy qylmystyq quqyq buzýshylyq sanatyna kirgen.

Sonymen birge, mınıstr baıandamasynda sońǵy jyldary ishki ister organdarynyń jumysy kóbeıip ketkenin aıtady.

- Ásirese, tergeý jáne anyqtaý qyzmetteriniń jaǵdaıy qıyn. Ótken jyldyń qorytyndysy boıynsha, ár tergeýshige túsetin qyzmettik júkteme 136 qylmystyq iske jetken, al onyń normasy 41 bolýy kerek. Bir anyqtaýshyǵa túsetin júkteme - 253 qylmystyq is bolǵan, al onyń nomasy - 51. Sondyqtan bul qyzmetterde shynymen de qıyndyqtarǵa ushyrap otyrmyz. Olar shtattyq turǵydan jáne materıaldy tehnıkalyq turǵydan kúsheıtýge zárý, - dedi Qalmuhambet Qasymov.

Mınıstrdiń aıtýynsha, ishki ister organdary kadrlyq tapshylyq ta kórip otyr. Qazir ishki ister organdarynyń túrli qurylymdarynda 1500 qyzmettik oryn bos turǵan kórinedi.