"Er týǵan jerine" tartady. Bıylǵy maýsym M.Áýezov teatrynyń 90 jyldyǵy qarsańynda qarashańyraqtyń kıeli sahnasyna 3 birdeı teatr tarlany qaıta oraldy.
Qazaqstannyń eńbek sińirgen qaıratkerleri Bolat Ábdilmanov pen Ǵanı Quljanovtyń izin ala Janat Tinbaev ta M.Áýezov teatrynyń akterlik quramyna qabyldandy.
Kórermen qaýymnyń júregin kógildir ekran arqyly jaýlap alǵan akter M.Áýezov teatryna qur alaqan kelgen joq. Jańalyǵyn ala keldi. Endi súıikti akterlerińizdi Emır Baıǵazınniń "Jaraly perishte" ("Ranenyı angel") kartınasynan tamashalaı alasyzdar. 13 mamyr kúni "Arman" kınoteatrynda tusaýy kesilgen fılmde bıologıa páni muǵaliminiń rolin oınaǵan akter: "90 jyldardaǵy halyqtyń áleýmettik, ekonomıkalyq jaǵdaıyndaǵy ózgerister jasóspirim, óskeleń urpaqqa kóp áserin tıgizdi. Elimizdegi kedergiler men keleńsizdikter jastardyń qoǵamǵa beıimdelýi, ósip jetilýi, armandaryna jetýine kedergi jasady. Atalǵan fılmde osyndaı qıyn-qystaý kezeńdegi kózdegen maqsattaryna, dittegen armandaryna jete almaǵan jastardyń bolashaǵyna tıgizgen zıany baıandalady. Óz basym sol ýaqyttardaǵy qıynshylyqtardy sezinip, sanasynda saralaı alatyn kóz ashyq azamattyń rolin oınadym", - deıdi.
Kórermen qaýymǵa "Qurdastar" (rej. Erlan Jumabek, 2010), "Ǵashyq júrek" (rej. Asqar Uzabaev, 2012), "Sanjar men Qaısar" (rej. Ahat Ibraev, 2012-2013), "Ómir ótkelderi" (rej. Naryn Erlan, 2013), "Kún saqshylary" (rej. Sanjar Sultanov, 2013) telehıkaıalary men "Ograblenıe po-kazahskı" (rej. Qaıyrjan Orynbekov, 2014) fılmi arqyly tanymal akter "M.Áýezov tatrynyń akterlik quramynda eńbek etip júrgen kezimde kınosalasynan kóptegen usynystar kelip túsýine baılanysty teatrdan ketýime týra keldi. Alaıda ónerge degen qushtaryńdy qandyratyn teatrdan asqan óner ordasy joq ekenin túsindim", - deıdi.
2011-2013 jj. Ákemteatrda eńbek etken J.Tinbaev M.Sársekeniń "Tenderge túsken kelinsheginde" Sergeı (rej. O.Kenebaev), S.Asylbekulynyń "Imperıadaǵy" kesh" dramasynda Berikbol (rej. A.Kákisheva), M.Kárimniń "Kúnaharynda" Ialshyǵul (aýd. Á.Kekilbaev, rej. O.Kenebaev), M.Zadornovtyń "Kúıeýińizdi satyńyzshy" komedıasynda Andreı (rej. O.Kenebaev), M.Áýezovtiń "Qıly zamanynda" Jańabaı, Á.Rahımovtiń "Shákáriminde" Halıtov (rej. Á.Rahımov), T.Ábdikovtiń "Uly men ury" qoıylymynda shákirt (rej. E.Obaev, E.Nursultan) rolderin oınaǵan bolatyn. "Saǵynyshtyń salqynyn salǵan úzilisten keıin teatr sahnasyna sýsap keldim. Sondyqtan rolge úlken, kishi dep qaramaımyn, qandaı rol berse de qýana-qýana oınaımyn", - dep aǵynan jarylǵan akterdi jaqyn arada 90-maýsymnyń kelesi premerasy Ǵ.Músirepovtiń "Aqan seri - Aqtoqty" dramasynan Jylgeldi beınesinde kóre alasyzdar.
Daıyndaǵan: Móldir BEKJAN
