Ulttyq-demokratıalyq ustanymdaǵy saıasatker, Bolathan Taıjan qorynyń prezıdenti, Jer reformasy jónindegi úkimettik komısıa múshesi Muhtar Taıjan osylaı dep málimdedi. Bul týraly  Qamshy.kz habarlaıdy.

Saıasatkerdiń aıtýynsha, komısıa quramynan shyǵý jer máselesin ońtaıly sheshýge aıtarlyqtaı septigin tıgize qoımaıdy.

«Komısıadan shyǵý onda «Nur otandyq» kópshiliktiń ortasynda jumysty jalǵastyrýdan, jer zańnamalaryn ózgertýge qol jetkizýden áldeqaıda jeńil», - degen saıasatker atalǵan komısıa quramynan ózi qurmetteıtin úsh adamnyń shyǵyp ketýi jer saýdasyna narazy azamattardyń kúsh-qýatyn báseńdetetinin jasyrmaǵan.

«Bul (belsendilerdiń komısıa quramynan shyǵýy – red.) árıne, bizdiń kúshimizdi álsiretedi. Biraq, men óz basym «Nurotandyqtar» ortasynda jalǵyz qalsam da komısıa quramyndaǵy jumysty jalǵastyramyn. Mundaı bola qoımaıdy dep úmittenemin», - degen Muhtar Taıjan «Feısbýkte» jarıalaǵan málimdemesinde.

Sondaı-aq, saıasatker qazir burynǵy ótken mıtıńterge qatysqandar men basqa da belsendilerdi qýdalaý sharalar júrip jatqanyn aıtady.

«Ótken mıtıńterge qatysqandardy qazir polısıaǵa shaqyryp, 21 mamyrdaǵy mıtıńke qatyspaıtyndyqtary týraly mindetteme jazǵyzyp jatqanyn bilip otyrmyn. Meniń ózim sońǵy eki aptada eki ret AİİD-ge jetkizildim, prokýrordan osyndaı eskertý aldym. Jalpy mundaı prokýrorlyq eskertýlerdi men 2012 jyldan beri alyp kelemin», - degen ol belsendilerge qysym kórsetýdi toqtatý týraly jer komısıasynyń alǵashqy otyrysynda da aıtqanyn alǵa tartady.

Komısıa jumysynan naqty nátıje kútetinin aıtqan Muhtar Taıjan máseleni tek «Komısıa-Parlament» satysynda ońtaıly sheshýge bolatynyna senimdi.

«Másele, komısıada biz neshe adam ekendigimizde emes. Másele onda halyqtyń oı-pikirin jetkizetin, aqylǵa qonymdy argýmentter aıtatyn jannyń bolýynda. Maǵan sondaı mısıa buıyrǵan eken, men ony laıyqty oryndaýym kerek.

(...) Biz ózimiz bılik qulaq aspaı jatyr dep, kelissóz alańy kerek dep suradyq. Mine, bılik halyq únin estip, bizge sondaı alań usyndy. Endi biz tikeleı dıskýssıadan alshaqtamaı, óz dáıektemelerimizdi aıtýymyz qajet. Sondyqtan, men ondaǵy jumysty jalǵastyramyn. Qazirgi tańda men qarapaıym sanaly oıdyń jeńiske jetetinine, nátıje bolatynyna senemin. Qoǵam men bılik ózgerister jasaıtyn deńgeıge jetti, bizdiń qoǵamnyń jalpy jaǵdaıymyz, naqty aıtqanda tyǵyryqqa tirelgeni bılikke de, qoǵamnyń ózine de, barlyǵyna belgili»,  - deıdi saıasatker.