Óner adamdarynyń basynan talaı qyzyq ta yńǵaısyz jaǵdaılar ótip turady. Ártisterdiń basynan ótken jaıttar týraly birneshe oqıǵalardyń toptamasyn, “Revú” usyndy.

Búginde prodúser atanǵan Bolmanov ABK tobynda júrgen kezin naǵyz juldyzdy shaǵym dep eske alady. Jas kúninde sońynan júgirgen tyńdarmandarynyń kóp bolǵanyn da jasyrmaıdy.

“ABK kezinde 30-40 myń tyńdarman kúzetshilerden ótip, bizge qaraı júgiretin. Sol sátte kózimizge teńiz sıaqty elesteıtin. Neshe túrli qorqynyshty jaǵdaı bolǵan”, – deıdi Qydyráli Bolmanov.

Mundaı jaǵdaı jubaıy Qaraqat Ábildınanyń da basynan ótken eken. Onyń tabynýshysy estelikke dep bir ýys shashyn julyp alǵan.

“Meniń shashym únemi uzyn bolyp júredi ǵoı. Stadıonda kópshilik arasynan ótip bara jattym. Osy kezde belgisiz tabynýshym bir ýys shashymdy julyp alǵan. Qyz nemese áıel ekeni esimde joq. Biraq estelikke dep julyp alǵan kezde, shalqaıyp júre almaı qaldym”, – deıdi Qaraqat Ábildına.

Al ánshi Qaırat Nurtasqa kúnine 200-300 boıjetken qońyraý shalsa, Tolqyn Zabırovaǵa jas jigit turmysqa shyǵýǵa usynys bildirgen. Ol tyńdarmanynan kelgen hatty oqyp, kóńiliniń kóterilip qalǵanyn aıtady.

“Men sizge úılengim keledi dep aıtatyndar bar. Sol kezde eriksiz kúlemin. Sonda meniń joldasym men úsh balam qaıda qalmaq?! Osydan bir-eki kún buryn ǵana meniń elektrondy poshtama jańaǵydaı hat keldi. Meni on segiz jasta dep oılaǵan shyǵar bálkim. Kúıeýimiz ekeýimiz kózimizden jas shyqqansha kúldik”, – dep ánshi qýanyshymen bólisti.

Tolqyn Zabırova mundaı mazmundaǵy hattarǵa qýanǵanymen, Qaırat Nurtas kerisinshe ábden mezi bolǵanyn aıtady. Osynyń saldarynan telefon nómirin jıi aýystyrady eken.

“Kúnde neshe túrli adam habarlasady. Joq degende 200-300 adam zvondaıtyn shyǵar. Báriniń de tanysqysy keledi. Sol úshin men telefon nómirimdi aı saıyn aýystyryp otyrýǵa májbúrmin”, – deıdi Qaırat Nurtas.

Juldyz qaýymy tyńdarmandarynyń bul qylyqtaryn búginde kúlip eske alady. Biraq aldaǵy ýaqytta mundaı qylyqtar qaıtalanbasa eken deıdi.