Qazaqstanda jolaýshy tasymaldaıtyn - 53, júk tasıtyn 10 áýe kompanıasy tirkelgen. Qazaqstan áýe kompanıalary baspasóz qyzmetiniń habarlaýynsha, áýe jelileriniń kóbi Ýkraınaǵa ushatyn turaqty jáne charterlik reısteriniń sanyn azaıtqan. Qazaqstannyń «Eır Astana» jetekshi áýe kompanıasy Astanadan Kıevke  dúısenbi jáne senbi kúnderi ushatyn; Almatydan dúısenbi, beısenbi kúnderi ushatyn reısterin qysqartqan. Kompanıanyń baspasóz qyzmetiniń Azattyq tilshisine aıtýynsha, Ýkraınadaǵy saıası daǵdarysqa baılanysty bul reısterdiń jolaýshysy azaıyp ketken. Skat Airlines kompanıasy Ýkraınaǵa reısterin múlde japqan. Áýe kompanıasy baspasóz qyzmetiniń Azattyq tilshisine habarlaýynsha, kompanıa naýryzdyń 1-inen 30-yna deıin bılet alǵan jolaýshylardyń aqshasyn qaıtaryp bergen. «Ýkraına halyqaralyq áýe jelileri» kompanıasy da keıbir reısterin toqtatyp otyr. Kompanıanyń Qazaqstandaǵy ókilderiniń aıtýynsha, buǵan suranystyń azaıýy sebep. Kompanıa ókilderi «áýe qozǵalysy shektelýine baılanysty Sımferopol áýejaıy «Ýkraına halyqaralyq áýe jelileri» reısterin qabyldap, qyzmet kórsete almaıdy» deıdi. Aqpannyń aıaǵynda «Ýkraına halyqaralyq áýe jelileri» kompanıasy eldegi saıası daǵdarys kesirinen jolaýshy jáne júk tasymaly azaıǵanyn málimdegen edi. İskerlik jáne týrısik saparlarǵa suranystyń azaıýy aqpan, naýryz aılarynda Ýkraınaǵa ushatyn reısterge aldyn ala bıletke tapsyrys berý deńgeıine de áser etti. Osy sebepti áýe kompanıasy reıster baǵdarlamasyn ońtaılandyryp, aqpannyń 24-inen naýryzdyń 29-yna deıingi ushý kestesinen birneshe reısti alyp tastaýǵa májbúr bolǵan. Azattyq radıosy