Jańadan qurylǵan Aqparat jáne komýnıkasıa mınıstrliginiń basshysy Dáýren Abaev Feısbýk áleýmettik jelisinen óz akkaýntyn ashty, - dep habarlaıdy Qamshy.kz.

Óz parashasyndaǵy alǵashqy jazbasynda mınıstr Feısbýktyń azamattyq belsendiliktiń aınasyna aınalyp otyrǵanyn aıtqan.

«Qymbatty dostar! Feısbýkten jeke paraqsha ashqanym, árıne, meniń jumysymmen baılanysty bolyp otyr. Búginde feısbýk-qaýymdastyq qazaqstandyqtardyń azamattyq belsendiliginiń aınasyna aınaldy. Bizdiń ómirimizdegi ózekti de ótkir máseleler osynda talqylanady. Men sizdermen turaqty baılanysta bola otyryp qana qoǵam tynysynyń tamyryn basyp otyrýǵa bolatynyna senimdimin», - dep jazdy Dáýren Abaev.

Sondaı-aq, mınıstr qazirgi tańda jańa mınıstrliktiń uıymdastyrý máselelerimen aınalysyp jatqanyn, jaqyn kúnderi óz josparlarymen bólisip, usynystar men ıdeıalardy qarastyra bastaıtynyn jazǵan.

Esterińizge salsaq, Dáýren Abaev 6 mamyr kúni jańadan qurylǵan Aqparat jáne komýnıkasıa mınıstrliginiń basshysy bolyp taǵaıyndalǵan bolatyn.