Feısbýk, ınstagram, vkontakte bolsyn, jer týraly jazylǵan ár pikir, komentarıdi bılik oqyp otyr. Jáne mundaǵy usynystar nazarǵa alynady. Keshe komısıanyń alǵashqy jumys qorytyndysyn jarıa etýge kelgen vıse-premer Baqytjan Saǵyntaev osylaı dedi, - dep habarlaıdy Qamshy.kz 31 arnaǵa silteme jasap.
Olar reforma týraly aıtý úshin Astana men Almatyǵa kelýdiń qajeti joq dep otyr. Sebebi, komısıadaǵy 70-ten astam adam jarty aıdan keıin jer-jerdi aralap, túsindirýge ózderi shyqpaq eken.
Túske deıin tynysh otyrǵan úkimet, taban asty «jer komısıasynyń» jumysymen tanystyramyz dep jýrnalıserdi jınap aldy. Vıse-mınıstr Baqytjan Saǵyntaev, aýylsharýashylyǵyna endi kelgen Asqar Myrzahmetov pen «Nur Otan» partıasy tóraǵasynyń birinshi orynbasary Muhtar Qulmuhammed nebári jarty saǵatta baıandama jasap, kúıip turǵan taqyrypty birge talqylaýǵa shaqyrdy.
BAQYTJAN SAǴYNTAEV, QR Premer-mınıstriniń birinshi orynbasary:
- Áleýmettik jelilerdegi BAQ basylyp, shyǵarylyp jatqan usynystardyń barlyǵy qaralyp jatyr. Jer úshin shynymen jany aýyratyn adamdardyń barlyǵy da óz sózin aıtýy kerek, sondyqtan barshalaryńyzdy osy turǵyda belsendi túrde talqylaýǵa qatysýǵa shaqyramyn.
«1434» - bul jer týraly saýaly barlardyń barlyǵyna habarlasýǵa bolatyn kol ortalyq nómiri. Ázirge munda 700 qońyraý túsken. «Jertýraly» saıtynda 30 adam pikir qaldyrypty. Qyzyǵy... habarlasýshylardy tipti basqa túıtkilder mazalaıdy dep otyr mınıstr.
ASQAR MYRZAHMETOV, QR Aýyl sharýashylyǵy mınıstri:
- 90 paıyzy sheteldikterge jerdi jalǵa berý, satý emes, tipti bólek, óziniń jerdi paıdalanýyna qatysty týyndap otyrǵan suraqtar. Sheteldikterge qatysty biren-saran suraqtar keldi. Kóbine turǵyn jerde turǵyn úı salý máselelerin sheshý, jalǵa alǵan jerlerdi kepildikke qoıyp nesıe alý máseleleri bar.
Jerdi satýdyń jaǵymdy jaqtaryn tizgen mınıstr: bankterge jerdi kepil etken kezde jaldaǵy jerlerdi baǵalaý quny tómen dedi. Jáne qazir jekede jeri barlar «telimderdi qaıta satyp alamyz ba» dep alańdaýly eken. Al bas partıaǵa endi kelgen Muhtar Qul-Muhammed jurttyń jer týraly ózgeristi áli túsinbeı júrgenin aıtty.
MUHTAR QUL-MUHAMMED, «Nur Otan» partıasy tóraǵasynyń birinshi orynbasary:
- Shet eldikterge jerdi satý degen norma qoldanystaǵy zańda da, usynyp otyrǵan zańymyzda da joq. Zańnyń statásy da, pýnkti de podpýnkti de joq. Sheteldikterge jer satý degen alypqashpa áńgime. Áıteýir bir aıtatyn aýyz bolǵan soń aıtyp qalaıyn dep aıtyp otyrǵan adamdar áńgimesi.
Dýbaıdyń tez damyǵany, sheteldikterge jer berip ınvestorlardy tartqany degen Muhtar Qul-Muhammed sheteldikterge telimniń ótip ketý tetikteri joq dep sendirdi.
MUHTAR QUL-MUHAMMED, «Nur Otan» partıasy tóraǵasynyń birinshi orynbasary:
-Eger sheteldiń azamaty qazaqstandyqqa úılengen kúnniń erteńinde ol azamattyq ala almaıdy. Ol kem degende 5 jyl turý kerek Qazaqstanda. 5 jyl turyp, nekege turǵannan keıin ol aryz jazý kerek azamattyq jónindegi komısıaǵa. Sodan keıin oǵan bere ma, bermeı ma qaraý kerek. Ony da qarap otyrǵan azamattar bar.
Sondaı-aq partıa tóraǵasynyń orynbasary pikir bildiremin dep Astana men Almatyǵa aǵylýdyń qajeti joqtyǵyn aıtty. Árkim ákimdikke baryp, qoǵamdyq keńeske jolyqsa bolady eken. Al maýsym aıynan bastap komısıaǵa múshe 70-ten astam adam reformany alyp, eldi-meken aralap, ár turǵyndarymen jeke kezdesedi.
