Turǵyndarǵa elektr qýaty baǵasyn negizsiz kóterip kelgen monopolıs kompanıanyń zańsyz áreketine sot núkte qoıdy, - dep habarlaıdy Qamshy.kz KTK arnasyna silteme jasap.

Qaraǵandy oblysy turǵyndarynyń jartysyn elektr qýatymen qamtıtyn «Jezqazǵanenergo» kompanıasy tarıfti zańsyz kótergen. Osy arqyly kompanıa 2 mıllıard 200 mıllıon teńge paıdaǵa kenelipti.

Kompanıa 2015 jyldyń basynda bir elektr energıasynyń bir kılovatynyń tarıfin 12 den 20 teńgege bir-aq sharyqtatyp jibergen edi. Sol kezde jurt shý shyǵarǵan soń, monopolıaǵa qarsy agenttik tekserip, tarıftiń joǵarylaýyn zańsyz dep tapty. Alaıda monopolıs kompanıa memlekettik mekememen bir jyl boıy sottasyp keledi. Osy ýaqyt ishinde ózderi belgilep alǵan tarıfpen halyqtyń qaltasynan 2 mıllıard teńgeden asatyn qarjyny qaǵyp alǵan. Aıtys-tartyspen is Joǵarǵy sotqa jetip, aqyry «Jezqazǵanenergo» tarıfti zańsyz kótergen degen sheshim shyqty. Endi monopolıs halyqtyń aqshasyn qaıtarýy tıis. 

Juldyz Eskenova Qaraǵandy oblystyq Monopolıaǵy qarsy departamentiniń bólim basshysy:

-Ár tutynýshy sotqa aryzdanyp kompanıadan bereshegin talap etýge quqyly. Joǵarǵy sottyń sheshimi negizge alynady.  Biz óz tarapymyzdan da kompanıanyń elge qaryzdy qaıtarýyn nemese qaıta esep júrgizýin qadaǵalaımyz.