QR Bas prokýrory Jaqyp Asanov qazaqstandyqtarǵa arandatýshylardyń mıtıńke qatysý týraly úndeýlerinen saq bolýǵa shaqyrdy, - dep habarlaıdy Qamshy.kz QazAqparatqa silteme jasap. 

«Qazaqstandyqtarǵa jer reformasyna qatysty resmı málimdeme jasaýǵa ruqsat berińizder. QR Prezıdentiniń 2016 jyl 6 mamyr kúngi Jarlyǵymen Jer kodeksiniń jekelegen normalaryna moratorıı jarıalandy. Memleket basshysynyń tapsyrmasymen azamattyq qoǵam ınstıtýttarynyń jetekshileri men belsendileri kiretin jer reformasy boıynsha komısıa quryldy. Aımaqtyq deńgeıde azamattar qoǵamdyq keńester arqyly komısıa jumysyna qatysa alady. Komısıa talqylaýy ashyq ótýde, onyń barysy BAQ betterinde jarıalanyp turady. «Jertýraly.Kz» saıtynda óz saýaldaryn qoıa alady, usynys-tilekterin jetkizýge múmkindikteri bar. Osylaısha, jer máselesi boıynsha, qoǵamdyq, toptyq jáne jeke bas múddelerin erkin jetkizýge jaǵdaı jasalyp otyr», - dep atap ótti ol búgin QR Bas prokýratýrasynyń zańdylyqty qamtamasyz etý konsýltatıvtik keńesiniń otyrysynda.

Degenmen, jekelegen tulǵalar bul jaǵdaılardy jáne zańdy eskermesten, ortaq suxbatqa kelýden bas tarta otyryp, xalyqty arandatýdy jalǵastyrýda, deıdi Bas prokýror.

«Qasaqana saıasılandyrý, áleýmettik jáne ulttyq alaýyzdyqty órshitetin jalǵan aqparatty taratý júrip jatyr. Ondaı áreketter QR zańnamasyna qaıshy keledi. Osy oraıda, qazaqstandyqtarǵa mundaı arandatýǵa moıynsunbaýdy, turaqtylyq pen bizdiń azamattarymyzdyń ómirine qaýip tóndirmeý úshin qatań azamattyq ustanym kórsetýge shaqyramyn», - dedi J. Asanov.

Sonymen qatar Bas prokýror zańsyz mıtıńke shaqyrý, oǵan qatysý ákimshilik nemese qylmystyq jaýapkershilikke ákeletindigin de tilge tıek etti.

«Quqyq qorǵaý organdary kezkelgen zańbuzýshylyqty aldyn alýǵa jáne zańǵa sáıkes qylmystyq qýdalaýǵa deıin tıisti sharalardy qabyldaýǵa mindetti», - deıdi J.Asanov.