Búgin jol qozǵalysynyń qaýipsizdigi jaıynda shuǵyl jıyn ótkizgen Shymkent qalasynyń ákimi Ǵabıdolla Ábdirahymov «júgensiz» jas júrgizýshilerdi malǵa teńedi, - dep habarlaıdy Qamshy.kz Otyrar.kz-ke silteme jasap.
«Eger balalarymyz jolda ólip jatsa, biz munda ne istep otyrmyz?!» dedi qala ákimi jıynǵa qatysqan ishki ister organdary ókilderi men pedagogtarǵa. Ol Shymkentte jol qozǵalysynyń qaýipsizdigi úshin eshqandaı jaǵdaılardyń jasalmaǵanyn ashyna aıtty.
«Nege biz qoǵamdyq kóliktiń jumysyn oń jolǵa qoıa almaı kelemiz, nege mektepti oqýshylardy tasymaldaıtyn avtobýstarmen qamtamasyz etpeımiz, nege bizdiń baǵdarshamdar jumys istemeıdi, nege bizdiń joldarda kórý múmkindigine kedergi keltiretin dúńgirshekter turady?» degen ákimniń suraqtaryna quzyrly organ qyzmetkerleri tek únsizdikpen jaýap berdi.
«2015 jyldyń 4 aıynda bizdiń joldarda 440 jol kólik oqıǵasy oryn alyp, saldarynan 16 adam qaza tapqan, olardyń 10-y balalar. Túrli dene jaraqattaryn 556 adam alǵan. 2016 jyldyń 4 aıynda 321 apat oryn alyp, 386 adam jaraqat aldy. Qaıtys bolǵandar sany - 22, olardyń 12-si balalar», - deıdi Ábdirahymov.
«Jol kólik oqıǵasynyń eki sebebi bar dep oılaımyn. Birinshisi - kólikti aıdaý mádenıeti. Bizdiń keıbir júrgizýshiler jolda ózderinen basqa eshkim joqtaı kólik aıdaıdy. Búgin men aýrýhanadan kele jatqanda aldymyzdan joǵary jyldamdyqpen Toıota Kamrı kóligi ótti. Ony polıseı toqtata alǵan joq. Artynan qýamyn dep júrgeninde shań qaptyryp ketti. Men júrgizýshime álgi kóliktiń sońyna túsýge tapsyrdym. Úıine deıin qýyp bardyq, ózi túsip tyǵylyp qaldy. Biraq, ol mindetti túrde jazasyn alatyn bolady. Osylaısha jol erejesin buzyp aıdaıtyndar ózderin mal sekildi ustaıdy, bulardyń kóbi jastar» dep atap ótti Shymkent ákimi atalǵan jıyn barysynda.
Onyń aıtýynsha, jol apatyn týdyratyn ekinshi sebep - joldardyń tym sapasyzdyǵy. Ol sondaı-aq, keshe toǵyz adamdy kóligimen qaǵyp ketken 19 jastaǵy bozbalanyń qatań jazalanýyn polıseılerge tapsyrdy.
«Kúdikti - Baqtybek Aıdos eń qatań jazany alýy tıis» dep sózin túıdi Ǵabıdolla Ábdirahymov.
Aıta keteıik, osy jıyn barysynda oqýshylarǵa jol qaýipsizdigi jumystaryn tıisti dárejede júrgizbegeni úshin Shymkent qalalyq bilim bóliminiń basshysy qyzmetinen bosatyldy.
