Petropavlda aýksıon arqyly boksshy Janat Jaqıanovtyń qolǵaby men Aleksandr Vınokýrovtyń jeıdesi saýdaǵa tústi, - dep habarlaıdy Qamshy.kz KTK arnasyna silteme jasap.

Bylǵary qolǵap 250 myńǵa, al olımpıada chempıony kıgen fýtbolka 500 myń teńgege ótken. Erekeshe uıymdastyrylǵan bás saýda qaıyrymdylyq kerýeni sheńberinde júzege asyryldy. Endi, qos sportshynyń zattarynan túsken qarajat syrqatqa shaldyqqan balalarǵa jumsalmaq.

Aýksıon túrindegi qaıyrymdylyq shara Petropavlda tuńǵysh ret ótkizilip otyr. Bás saýda barysynda qazaqtyń qara jorǵasy men juptyq bı de oryndaldy. Onda ulttyq naqyshta bir kelki kostúm kıingen bıshiler jurttyń tańdanysyn týdyrdy.

Dılára Sabyrova, horeograf:

-Biz qaıyrymdy jandardy izdeýge májbúr boldyq. Atap aıtqanda, úılený salondaryn araladyq. Sonyń nátıjesinde eń ádemi 40kóılekti tegin aldyq. 

Qaıyrymdylyq sharasyna qatysqan bıshilerdiń 40 juby buǵan jarty jyl daıyndalǵan eken. Tipti, qyzdar kastıng arqyly iriktelip alynǵan. Olarmen bıge shyqqan uldar áskerı oqý ornynyń kýrsanttary. Sondyqtan olarǵa kıim jaǵynan eshqandaı qıyndyq bolmaǵan kórinedi. Aýksıonǵa ulasqan sharada veloshabandoz Aleksandr Vınokýrovtyń jeıdesi men áıgili boksshy Janat Jaqıanovtyń qolǵaby satylymǵa shyǵaryldy.

Ásemgúl Esqoja, uıymdastyrýshy:

-Biz Aleksandr Vınokýrovtyń ata- anasyna habarlastyq. Olar, bizge sportshy uldarynyń kımin jetkizip berdi. Al, Janat Jaqıanovtyń ózi bylǵary qolǵabyn usyndy.

Bás saýda sheńberinde boksshynyń qolǵaby 250 myńǵa, al veloshabandozdyń jeıdesi bul baǵadan eki ese qymbatqa satyldy.

Syrqatqa shaldyqqan úsh balanyń em-domy úshin uıymdastyrylǵan aýksıonnan, jalpy 2 mln teńge tabys tústi. Oǵan qatysýshylar jalǵyz qoǵap pen jeıdeni ǵana emes, kartınkalardy da qymbat baǵaǵa satyp alǵan. Tipti qeıbireýi qomaqty qarajat jumsaǵanymen zattaryn almaı ketipti.