Qazaqstandyq tanymal juldyz Qaırat Nurtas Shymkenttegi «Nazar-Tekstıl» toqyma kilem fabrıkasynda boldy, - dep habarlaıdy Qamshy.kz Korrespondent.kz -ke silteme jasap.
Óndiris ornynyń jumys barysymen tanysqan juldyz shymkenttik kilemderdi kórip, qýanǵanyn ári tań qalyp otyrǵanyn jasyrmady. Óz sózinde ánshi otandyq ónimdi árqashan qoldaıtynyn jáne ózi de jıi tutynyp júrgenin alǵa tartty.
Fabrıkanyń atqarýshy dırektory Iakýb Dýmannyń aıtýynsha, óndiris ornyndaǵylar qazaq estradasynyń on shaqty juldyzyna arnaıy habarlasyp, óz ónimderin qoldaýǵa shaqyrǵan eken. Alaıda ázirge Qaırat Nurtastan ózgeleri oń jaýap bermepti. Dırektor mundaı bastama arqyly aldymen otandyq ónimge degen suranystyń artaryna senimdi. Odan ózge qarapaıym jumysshylar súıikti ánshilerin óz kózderimen kórip, kópten bergi armandary oryndalǵanyn da jasyrmady.
«Fabrıka basshylyǵy meniń dırektoryma habarlasyp, osyndaı usynystaryn aıtypty. Qazaq azamattarynyń eshbir sheteldik ınvestorlardyń kómeginsiz ashyp otyrǵan mundaı jumysyn biz qoldaýymyz qajet qoı. Usynysty estı sala, qýana kelistim. Óndiris ornynyń jumysymen tanysyp, tań qalyp otyrmyn. Negizi Shymkentte zaýyttar kóp qoı. Ásirese jylyjaı» degen Qaırat Nurtas ózi de otandyq ónimdi jıi tutynatynyn jasyrmady.
«Ózderińiz bilesizder, meniń «KN» degen ataýmen kıim sehym bar. Otyz shaqty qyzmetkerim balabaqshalar men ánshilerge kıimder tigedi. Meniń de kóp kıimderim sol sehtyń ónimderi. Sonymen qatar óz aýlamda jylyjaı ádisimen qyzanaq pen qıar egip, sony qys boıy jep shyqtyq» dep aǵynan jaryldy óner ıesi.
Tanymal juldyzben kezdesken fabrıka qyzmetkerleri súıikti ánshilerine arnap «Aýyrmaıdy júrek» ániniń áýenimen án shyrqap berdi. Óz kezeginde ánshi de qyzmetkerlermen birge án aıtyp, estelikke sýretke tústi. Munan soń fabrıka ujymy Nurtastyń beınesi beınelengen kilem syılady.
Aıta keteıik, qazaqstandyq juldyzdar arasynda qalamaqysy jaǵynan kósh bastaıtyn óner ıesi fabrıkaǵa jasaǵan saparyna eshqandaı gonorar almaǵan. «Otandyq ónimdi qoldaýǵa shaqyryp, bastama kótergen fabrıkadan qalaısha aqsha alýym kerek? Men júz emes, eki júz paıyz qoldaımyn mundaı jumysty» degen ánshi buǵan deıin atalǵan óndiris ornynan qos kilem satyp alyp úlgergen.
