Almatyda "ARAGOSTA CAFE"túngi klýbynan órt shyqty, - dep habarlaıdy Qamshy.kz. Almaty qalalyq TJD-ne silteme jasap.

Eskertý: Vıdeoda bylapyt sózder aıtylady.

Almaty qalalyqt TJD resmı ókili Sandýǵash Baımuhanbetovanyń aıtýynsha, búgin tańǵy saǵat 05:25-te Almaty qalalyq TJD «101» kezekshi bólimine bir kýágerden Almaly aýdany, Rozybakıev kóshesi 72 «B» mekenjaıynda ornalasqan "ARAGOSTA CAFE" klýbynyń shatyrynyń janyp jatqany týraly habar kelip túsken.

«Órt sóndirýshilerdiń alǵashqy toby oqıǵa ornyna 5 mınýttan keıin kelip jetti. Belgili bolǵanyndaı, dámhana shatyrynyń kóp bóligin jalyn sharpyǵan. Sonyń saldarynan búkil shatyrdyń janyp ketýi jáne órttiń japsarlas ornalasqan kórshi ǵımaratqa ótip ketý qaýpi týyndady. Onyń ústine ókinishke qaraı,  dámhana tóbesiniń janǵysh mıneraldyq maqtamen qymtalǵany órttiń tez taraýyna sebep boldy. Sondaı-aq, órt sóndirýshiler oqıǵa ornynan shashylyp jatqan birneshe órt sóndirgishti tapty. Sóıtse, ǵımarattyń kúzetshisi órtti tańǵy saǵat 04:45-te baıqapty. Sóıtip, óz kúshimen sóndirmek bolǵan. Órt sóndirý barysynda 50 lıtrlik 3 gaz jáne 2 kómirqyshqyl balony qaýipsiz aımaqqa shyǵaryldy», - dedi Sandýǵash Baımuhanbetova.

Tilsiz jaý 06 saǵat 43 mınýtta aýyzdyqtaldy. Tilsiz jaýdyń aýmaǵy 1 200 sharshy metrdi qurady.

«Órt sóndirý barysynda polısıa qyzmetkerleri jaqyn mańda ornalasqan 9 qabatty turǵyn úıden 40 turǵyndy qaýipsiz aımaqqa shyǵardy. Zardap shekkender men qurban bolǵandar joq. Órtti sóndirýge Almaty qalalyq Tótenshe jaǵdaılar departamentiniń «Órt sóndirý» qyzmetiniń jeke quramynan 80 adam men 19 tehnıka jumyldyryldy.  Órttiń aýmaǵy 1200 sharshy metrdi qurady. Tańǵy saǵat 07:34-te órt tolyǵymen sóndirildi», - dedi Sandýǵash Baımuhanbetova.

Aıta ketelik, qazir órttiń shyǵý sebepteri anyqtalyp jatyr.