QR Mádenıet jáne sport mınıstri Arystanbek Muhamedıuly qyrǵyzdardy renjitken sózderi úshin keshirim surap, óz oıynyń teris maǵynada qabyldanǵanyn jetkizdi. Bul týraly vıse-mınıstr Ǵalym Ahmedárovtyń jazǵan hatynda aıtylǵan, - dep habarlaıdy Qamshy.kz Baq.kz –ke silteme jasap
«23 mamyr kúni "Qazaqstan" konsert zalynda QR Mádenıet jáne sport mınıstri Arystanbek Muhamedıuly halyqpen kezdesip, 2015 jyly atqarylǵan jumystarǵa esep berdi. Suraq-jaýap barysynda mınıstr óziniń súıikti jazýshysy Shyńǵys Aıtmatovtyń shyǵarmashylyǵyna qatysty saýalǵa jaýap bergen bolatyn. Mınıstrdiń osynaý sózderin BAQ ókilderi tolyq bermeı, úzip alyp sıtata retinde jarıalady. Saldarynan, A.Muhamedıulynyń sózderiniń maǵynasy ózgerip shyǵa keldi. Ony keıin BAQ ókilderi taǵy talqylap jatty. Shyndyǵynda, uly jazýshy Shyńǵys Aıtmatovtyń aldynda bas ıe otyryp, mınıstr onyń shyǵarmalarynyń tereń maǵynaly ekenin, júreginde óz ulty jaıly myńdaǵan oramnyń bar ekenin jetkizgisi kelgen edi.
Mınıstr qazaqstandyqtarǵa jazýshynyń dana sózderin aıtty: "Biz - adamdar, bárimiz bir qaıyqtamyz, aldymyzda úlken muhıt" dep... Biz osy qaıyqty álemde bolyp jatqan jaǵdaılar shaıqamasa deımiz. Qalaı bolǵanda da, biz ózimizdiń rýhanı muralarymyzdan, mádenıetimizden bas tartpaýymyz kerek, ulttyq qundylyqtarymyzdy joǵaltpaýymyz tıis.
Sondaı-aq, Shyńǵys Aıtmatovtyń ómirlik fılosofıasyn mysalǵa keltire otyryp, mınıstr baýyrlas halyqtardyń tarıhy, dini, dástúri jáne mádenıeti ortaq ekenin, endi odan ári damý úshin bir-birimizden úırenerimiz kóp ekenin aıtty.
Biz tereń tarıhy men keremet mádenıeti bar, Tolomysh Okeev pen Súımenqul Chokmorov sekildi talanttardy dúnıege ákelgen qyrǵyz halqyn uly bolashaq pen ekonomıkalyq turaqtylyq kútip turǵanyna senimdimiz. Biz - qazaqstandyqtar men qyrǵyzstandyqtar óz danalarymyzdyń sózderin este saqtap, evolúsıalyq damý jolymen birge júrýimiz qajet. Biz mınıstr Arystanbek Muhamedıulynyń qyrǵyz halqyna úlken qurmetpen qaraıtynyn taǵy da aıtqymyz keledi jáne onyń keshegi sózderinde bireýdi renjiteıin degen oı bolǵan joq. Ol óz sózi men oıynyń teris maǵynada qabyldanǵany úshin keshirim suraıdy», - delingen vıse-mınıstrdiń hatynda.
Aıta keteıik, keshe atqarylǵan jumystaryna esep bergen Arystanbek Muhamedıuly Máskeý dárethanalaryn jýyp júrgen qyrǵyzdyń boıjetkenderi týraly aıtqan bolatyn. «Jasyratyny joq, Máskeýge nemese ózge qalalarǵa ushyp kelseń qoǵamdyq dárethanalardy jap-jas qyrǵyzdyń qyzdary jýyp júredi. Bul árıne, kóńilge aýyr tıetini sózsiz. Naǵyz jastyq shaǵynda nelikten olar dárethana jýyp júr dep oılaısyń? Elinde jumys nemese bolashaq bolmasa árıne, qyrǵyzdar ózge qalalarǵa baryp kúneltýge májbúr. Osyny erterekte bilip eskertken Shyńǵys Aıtmatov — uly jazýshy», - degen bolatyn Arystanbek Muhamedıuly sol eseptik jıynda.
Munan keıin Qazaqstannyń tanymal azamattary, qoǵam belsendileri mádenıet mınıstri úshin baýyrlas qyrǵyz halqynan keshirim suraǵan.
Esterińizge sala keteıik Qyrǵyz Respýblıkasynyń Syrtqy ister mınıstrligi eldegi Qazaqstan Respýblıkasy Elshiliginiń keńesshi-elshisi Erbol Ahmetovty shaqyryp, Qazaqstanǵa qarsylyq notasyn joldaǵan bolatyn.
