Úkimet janyndaǵy Jer komısıasy quqyqtyq jumys tobynyń jetekshisi Muhtar Taıjan 21 mamyr kúni respýblıka boıynsha myńnan astam adam ustalǵan málimdedi. Bul týraly Qamshy.kz habarlaıdy.
Quqyqtyq toptyń alǵashqy otyrysynan soń jýrnalıserge top jetekshisi 21 mamyr kúni el boıynsha 1083 azamattyń tutqyndalǵanyn jetkizdi.
«2016 jylǵy 21 mamyr kúni 1083 azamat ustalǵan. Olardyń eshqaısysy buzaqylyq jasamaǵan. Olardyń barlyǵy saýatty, patrıot azamattar. Biz HHİ ǵasyrda ómir súrýdemiz, mundaı áreketterden tartynýymyz kerek. Ustalǵandar Atyraý, Oral, Almaty, t.b. qalalardyń turǵyndary. Bul aqparatty men quzyrly derekkózderden alyp otyrmyn», - deıdi M. Taıjan.
Sondaı-aq, M. Taıjan búgin Bas prokýrordyń orynbasary Andreı Kravchenkomen kezdesip, ustalǵandar boıynsha Bas prokýratýranyń aldyna naqty másele qoıatynyn aıtty.
«Bas prokýrordyń ózimen kezdeskim kelgen. Biraq, olar Kravchenkomen ǵana kezdesý múmkin ekenin aıtty. Olardan men osy ustalǵandardyń isin jeke-jeke taldaýdy talap etemin. Ustalǵandar esh buzaqylyq jasamady. Olar bizdiń azamattarymyz. Eshkimge tıispeı, ózimen-ózi turǵan azamattardy ustap, alyp ketken. Polısıa óz isterine jaýap berýleri kerek», - deıdi ol.
Budan buryn M. Taıjan Astanadan Almatyǵa arnaıy kelip, 21 mamyr kúni túnde ákimshilik sotqa tartylǵandarmen júzdeskenin, 22 mamyr kúni Almatyda zańsyz ustalǵan azamattardyń aryz-shaǵymdaryn jınaǵanyn jazǵan bolatyn.
21 mamyr kúni respýblıkanyń birqatar qalalarynda polısıa ustap alyp ketken azamattardyń naqty sany týraly áli kúnge resmı aqparat taralmaǵanyn esterińizge salamyz.
