Kúni keshe búkil eldi dúrliktirgen Ońtústik Qazaqstan oblysynda bolǵan qaıǵyly jaǵdaı jurtshylyqtyń qabyrǵasyn qaıystyrǵany belgili. Zábirmen óltirilgen saryaǵashtyq stýdent Aıgerim Ospanbekovanyń otbasyna kóńil aıtýshylar sany saǵat sanap artýda. Bul jaıtqa shymkenttik polıseıler de beı-jaı qaraı almady. Jergilikti poılsıa qyzmetiniń basshysy Danıar Meıirhan áleýmettik jeli arqyly qaza bolǵan qyzdyń otbasy men týystaryna kóńil aıtyp, júrek tebirenter hat joldady, - dep habarlaıdy Qamshy.kz Korrespondent.kz –ke silteme jasap.
«Balany joǵaltqannan aýyr jáne qorqynyshty eshteńe joq shyǵar. Bul jaǵdaıda qatysty tamshydaı bolsa da jeńildetetindeı sóz tabý qıyn bolyp otyr. Dál qazir sizge óte aýyr ekenin bilemiz. Shyn kóńilden qaıǵyńyzǵa ortaqpyz» dep jazǵan polıseı qaýipsizdik sharalary týraly da atap ótýdi jón sanaǵan.
«Bul qaıǵyly oqıǵa, ókinishke oraı, osyǵan uqsas aýyr qylmystar qataryn taǵy da toltyrdy. Búgingi tańda jekemenshik taksıler azamattar úshin qaýipti bolyp otyr. Qym-qýyt, únemi jyljýdy qajet etetin tirshilikte tipti jeke bas qaýipsizdigimizdi umytyp ketetinimiz bar. Osyǵan baılanysty, Shymkent qalasynyń JPQ tasymaldaý qyzmetin paıdalanýshylardy qarapaıym ǵana qaýipsizdik erejelerin saqtaýdy usynady. Bul, eń bastysy - jekemenshik tasymaldaýshylardan bas tartyp (sonymen qatar zańsyz taksı qyzmeti), resmı tirkelgen taksıdi shaqyrý. Tıisti tehnıkamen, baılanys quraldarymen jáne GPS-navıgatormen jabdyqtalǵan taksılerde jeke bas qaýipsizdigimen qatar, júrgizýshimen daýlasýdan jáne kóliktiń buzylý qaýpinen de qutylasyz.
Este saqtańyz, bundaı múmkindigi joq, qaladan shalǵaı aýyldy jerlerde kólikke otyrǵanda, týystar men dostaryńyzǵa avtokóliktiń memlekettik nómirin, shamamen keletin ýaqyty men júrgizýshi týraly jeke málimetti habarlaýyńyz qajet. Navıgasıasy bar telefon bolǵan jaǵdaıda, ony jyljý barysynda qosý kerek.
Este saqtańyz, jeke bas qaýipsizdigińizge nemquraıdy qaraımyn dep, baǵaly zattaryńyz ben aqshańyzben qatar, óz ómirińizden de aıyrylýyńyz múmkin. Ómirimizdi budan da jaqsartýǵa birge kúsh salaıyq. Joldaryńyz árqashan ashyq bolsyn. Shymkenttegi jergilikti polısıa qyzmetiniń atynan qaıǵyryp kóńil aıtamyz. Qurmetpen, Danıar Meıirhan» delingen jelidegi habarlamada.
