Astana máslıhaty Ulttyq panteon salý maqsatynda Astana shekarasyn keńeıtýdi maquldady, - dep habarlaıdy Qamshy.kz Tengrinews.kz – ke silteme jasap.
Máslıhattyń kezekten tys sesıasynda Astananyń ákimshilik shekarasyn ózgertý týraly másele qaraldy. Munda Jer qatynastary basqarmasynyń basshysy Tóleýǵazy Nurkenov Ulttyq panteonnyń qurylysy men qalalyq zırattyń qurylysy úshin qala shekarasyn keńeıtýdiń qajettiligin aıtty.
"Qalaǵa Aqmola oblysyndaǵy Selınograd aýdanyndaǵy Qabanbaı batyr men Talapker aýyldyq okrýgtarynyń 1419 gektar terıtorıasyn berý usynylyp otyr. Bul terıtorıany berý Memleket basshysynyń Ulttyq panteon salý jáne qalalyq jańa zırat salý týraly tapsyrmasyn oryndaý úshin talap etiledi", - dep habarlady Nurkenov.
Basqarma basshysy Ulttyq panteonnyń Aqmola oblysynyń Selınograd aýdanynda, Astanadan 13 shaqyrym jerdegi 959 gektar aýmaqty alatynyn aıtty. "Máslıhat búgin bekitti, ol Aqmola oblysyna joldanady. Onda bul máseleni qabyldaıdy, sosyn biz muny úkimetke joldaımyz, keıin Prezıdenttiń terıtorıany keńeıtý týraly Jarlyǵy daıyndalady. Jyl sońyna deıin aıaqtaımyz dep otyrmyz", - dedi Nurkenov.
Sonymen qatar, ol qalaǵa 7300 gektar jerdi jańa termınal salýǵa jáne Astananyń Halyqaralyq áýejaıynyń ushý-qoný jolaǵynyń rekonstrýksıasynyń qurylysyna qajet bolatynyn aıtty.
Nurkenov Halyqaralyq áýejaı, Eır Astana jáne Qazaqstandyq iskerlik avıasıa ortalyǵy sıaqty uıymdarǵa arnaıy jer ýchaskeleriniń bólingenin habarlady, jalpy alǵanda 347,60 gektar bólinedi eken. Munda osy nysandardyń jobalaýy boıynsha jumystar júrip jatyr.
Eske salaıyq, osyǵan deıin 2016 jyldyń sońyna deıin Astana qalasynyń shekarasy 9 myń gektarǵa keńeıtiletiri habarlanǵan edi. Nazarbaev jyl saıynǵy halyqqa Joldaýynda halyqaralyq áýejaıdy keńeıtý qajettigin aıtqan bolatyn. Osyǵan oraı qala ákimdigi irgeni keńeıtýge 3340 gektar jer bóldi. Qazir onda úlken áýejaıdyń qurylysy júrip jatyr. Sonymen qatar, shahardy odan saıyn úlkeıtý maqsatynda taǵy 7300 gektar bólindi. Maıbalyq kóline deıin. Ol jer turǵyndar demalatyn oryn bolmaq.
Pikir qaldyrý